हिमाल आइरनका १५० बढी मजदुर ९ महिनादेखि तलबविहीन, सांसद पन्तद्वारा सरकारको ध्यानाकर्षण

वीरगन्ज । पर्सा क्षेत्र नम्बर १ का प्रतिनिधिसभा सदस्य हरि पन्तले वीरगन्ज महानगरपालिका–३२ स्थित हिमाल आइरन एन्ड स्टिल उद्योगका मजदुरले ९ महिनादेखि तलबभत्ता नपाएको विषयमा सरकारको ध्यानाकर्षण गराएका छन्।

बुधबार प्रतिनिधिसभाको बैठकमा बोल्दै राष्ट्रिय स्वतन्त्र पार्टी (रास्वपा)का सांसद पन्तले उद्योगमा कार्यरत १५० भन्दा बढी मजदुरले ९ महिनादेखि तलबभत्ता नपाएको बताएका हुन्। लामो समयदेखि पारिश्रमिक नपाउँदा मजदुर र उनीहरूका आश्रित परिवार आर्थिक समस्यामा परेको उनले बताए।

दशैं, तिहारलगायतका प्रमुख चाडपर्व नजिकिँदै गर्दा समेत मजदुरले पारिश्रमिक नपाएको भन्दै पन्तले उनीहरूले उद्योगबाट पाउनुपर्ने तलबभत्ता यथाशीघ्र उपलब्ध गराउन सरकारले पहल गर्नुपर्ने माग गरे।

कुनै समय हजारौँ श्रमिकलाई रोजगारी प्रदान गरेको ज्योति समूहअन्तर्गतको हिमाल आइरन एन्ड स्टिल अहिले १५० जना श्रमिकलाई समेत ज्याला दिन नसक्ने अवस्थामा पुगेको सांसद पन्तको भनाइ छ।

उनले निजी क्षेत्रप्रति सरकारको नीति तथा बैंकिङ लगानी नीतिका कारण कतिपय उद्योग आर्थिक संकटमा पर्दै गएको दाबीसमेत गरे। उद्योग तथा व्यवसाय क्षेत्रलाई संकटबाट जोगाउन सरकारले आवश्यक नीतिगत पहल गर्नुपर्नेमा उनले जोड दिए।