काठमाडौं । दसैँ, तिहार तथा छठ पर्वलाई लक्षित गर्दै काठमाडौं प्रहरीले विशेष सुरक्षा योजना लागू गरेको छ। पर्वका समयमा हुने भीडभाड, चोरी–डकैती तथा अन्य आपराधिक गतिविधि नियन्त्रण गर्न काठमाडौंका विभिन्न क्षेत्रमा ठूलो संख्यामा प्रहरी परिचालन गरिने भएको हो।

काठमाडौं प्रहरीले सार्वजनिक गरेको सुरक्षा योजनाअनुसार भीडभाड हुने बजार, धार्मिक स्थल, यातायात क्षेत्र तथा संवेदनशील स्थानमा ३ हजार ५०६ जना प्रहरी परिचालन गरिनेछ।

सुरक्षा व्यवस्थालाई थप प्रभावकारी बनाउन ड्रोन निगरानी, तालिमप्राप्त कुकुर, १ हजार २४२ वटा सिसिटिभी, मोबाइल गस्ती तथा क्यूआर टोली परिचालन गरिने प्रहरीले जनाएको छ। साथै, विभिन्न स्थानमा नियमित चेकजाँचसमेत कडाइ गरिनेछ।

पर्वका बेला यात्रु तथा सर्वसाधारणलाई आवश्यक सहयोग र सूचना उपलब्ध गराउन १२ वटा नागरिक सहायता कक्ष सञ्चालन गरिने भएको छ। विशेषगरी भीडभाड हुने क्षेत्र तथा यातायात केन्द्रमा सहायता कक्षमार्फत नागरिकलाई सहजीकरण गरिने प्रहरीले जनाएको छ।

प्रहरीका अनुसार दसैँ–तिहार तथा छठका समयमा हुनसक्ने चोरी, पाकेटमारी, ठगी, जुवातास, नक्कली नोटको कारोबार तथा पेय पदार्थमा नशालु पदार्थ मिसाउनेजस्ता गतिविधि नियन्त्रणमा विशेष निगरानी गरिनेछ।

त्यस्तै, पर्वका बेला बढ्न सक्ने सवारी दुर्घटना तथा अन्य सुरक्षा जोखिम न्यूनीकरणका लागि समेत विशेष ध्यान दिइने प्रहरीले जनाएको छ।

काठमाडौं प्रहरीले पर्वको समयमा सर्वसाधारणको सुरक्षा, आवतजावतमा सहजता तथा शान्तिपूर्ण वातावरण कायम गर्न सुरक्षा व्यवस्था थप मजबुत बनाइएको जनाएको छ।

काठमाडौं । नेपालीहरूको महान् चाड दसैँ तथा तिहारलाई लक्षित गर्दै काठमाडौंमा सुरक्षा व्यवस्था कडा पारिएको छ। चाडपर्वको समयमा हुन सक्ने आपराधिक गतिविधि, चोरी, लुटपाट, ठगी तथा अवैध गतिविधि नियन्त्रण गर्न प्रहरीले विशेष सुरक्षा योजना लागू गरेको हो।

जिल्ला प्रहरी परिसर काठमाडौंका अनुसार काठमाडौं जिल्लामा मात्रै ३ हजार ५०६ जना सुरक्षाकर्मी परिचालन गरिने भएको छ। प्रहरी उपरीक्षक दानबहादुर थापाका अनुसार बर्दीधारी तथा सादा पोशाकका प्रहरीलाई विभिन्न २२ प्रकारका संवेदनशील ड्युटीमा परिचालन गरिएको छ। आवश्यकता र संवेदनशीलताका आधारमा थप प्रहरीसमेत परिचालन गरिने प्रहरीले जनाएको छ।

उपत्यका प्रवेश गर्ने प्रमुख नाकाहरूमा तालिमप्राप्त कुकुरसहित २४ घण्टा चेकजाँच तथा सीसीटीभीमार्फत निगरानीलाई समेत तीव्र बनाइएको छ।

चाडपर्वमा यी ५ काम नगर्न प्रहरीले आग्रह गरेको छ

१. जुवातास, कौडा तथा अनलाइन सट्टेबाजी

दसैँ–तिहारको नाममा घर, होटल, फार्महाउस वा अन्य स्थानमा जुवातास तथा कौडा खेल्ने–खेलाउने कार्य नगर्न प्रहरीले सचेत गराएको छ। अनलाइन सट्टेबाजीमा समेत संलग्न भएको पाइएमा कानुनअनुसार कारबाही हुन सक्नेछ।

२. पाकेटमारी तथा चोरी

चाडपर्वमा बजार, सार्वजनिक यातायात, बसपार्क तथा सपिङ क्षेत्रमा हुने भीडलाई लक्षित गरी पाकेटमारी तथा चोरी हुन सक्ने भएकाले प्रहरीले विशेष निगरानी बढाएको छ। चोरी वा झोला तान्ने लगायतका गतिविधिमा संलग्न भएको पाइएमा कानुनी कारबाही गरिनेछ।

३. मादक पदार्थ सेवन गरेर सवारी चलाउने

चाडपर्वको समयमा मापसे जाँचलाई थप कडाइ गरिने प्रहरीले जनाएको छ। मदिरा वा लागूऔषध सेवन गरी सवारी चलाउनु कानुनविपरीत भएकाले त्यस्तो अवस्थामा सवारी नचलाउन प्रहरीले आग्रह गरेको छ।

४. पटाका तथा आतिशबाजीको अवैध प्रयोग

तिहारका क्रममा पटाका, भुइँचम्पा लगायतका विस्फोटक प्रकृतिका सामग्रीको अवैध ओसारपसार, बिक्री तथा प्रयोग नगर्न प्रहरीले सचेत गराएको छ। त्यस्ता गतिविधिमा संलग्न भएको पाइएमा प्रचलित कानुनअनुसार कारबाही हुन सक्नेछ।

५. टिकटमा ठगी तथा कालोबजारी

चाडपर्वमा यात्रुसँग तोकिएभन्दा बढी भाडा असुल्ने, नक्कली टिकट बिक्री गर्ने वा उपभोग्य वस्तुमा कृत्रिम अभाव सिर्जना गरी कालोबजारी गर्ने कार्यविरुद्ध समेत निगरानी बढाइएको छ।

प्रहरीले चाडपर्व मनाउन घरबाट बाहिर जाने नागरिकलाई आफ्नो घरको सुरक्षामा विशेष ध्यान दिन आग्रह गरेको छ। लामो समय घर खाली छाडेर जानुपर्ने भए छिमेकी वा नजिकको प्रहरी कार्यालयलाई जानकारी गराउन तथा बहुमूल्य सामान सुरक्षित स्थानमा राख्न प्रहरीले अनुरोध गरेको छ।

चाडपर्वलाई सुरक्षित, व्यवस्थित र शान्तिपूर्ण बनाउन नागरिकले समेत सुरक्षा निकायलाई सहयोग गर्नुपर्ने प्रहरीले जनाएको छ।

काठमाडौं । नागढुंगा सुरुङमार्गभित्र सवारीसाधन ओभरटेक गरी चलाएको भन्दै दुई माइक्रोबसलाई काठमाडौं उपत्यका ट्राफिक प्रहरी कार्यालयले कारबाही गरेको छ।

सोमबार सुरुङमार्गभित्र ट्राफिक नियम उल्लंघन गर्दै ओभरटेक गरेको पाइएपछि बा.प्र.०१–००६ ख ८८८० र बा.प्र.०१–००७ ख १७९४ नम्बरका माइक्रोबसलाई कारबाही गरिएको हो।

प्रहरीका अनुसार सुरुङमार्गभित्र ओभरटेक गर्दा दुर्घटनाको जोखिम बढ्ने भएकाले चालकले निर्धारित लेन र गति कायम राख्दै ट्राफिक नियमको पूर्ण पालना गर्नुपर्छ।

कारबाहीमा परेका चालक बलराम सिवाकोटी र बालकृष्ण श्रेष्ठलाई जनही ५ सय रुपैयाँ जरिवाना गरिएको काठमाडौं उपत्यका ट्राफिक प्रहरी कार्यालयले जनाएको छ।

ट्राफिक प्रहरीले नागढुंगा सुरुङमार्गमा सवारी चलाउँदा निर्धारित गति, लेन अनुशासन तथा अन्य ट्राफिक नियम पालना गर्न सबै चालकलाई आग्रह गरेको छ। साथै, सुरुङमार्गभित्र जथाभावी ओभरटेक नगर्न र सम्भावित दुर्घटनाबाट बच्न विशेष सावधानी अपनाउनसमेत अनुरोध गरिएको छ।

सुरुङमार्गजस्तो सीमित स्थानमा सानो लापरबाहीले पनि ठूलो दुर्घटना निम्त्याउन सक्ने भएकाले चालकले अनुशासित र सुरक्षित रूपमा सवारी सञ्चालन गर्नुपर्ने प्रहरीले जनाएको छ।

काठमाडौं । कृषि, वन तथा पर्यावरणमन्त्री गीता चौधरीले आगामी मंसिर १ गतेदेखि काठमाडौं उपत्यकामा पशु वधशाला तथा मासु जाँच ऐन, २०५५ अनिवार्य रूपमा कार्यान्वयनमा ल्याइने बताएकी छन्।

मन्त्रालयले सोमबार आयोजना गरेको ‘पशु वधशाला र मासु जाँच ऐन, २०५५ कार्यान्वयनको अवस्था र अबको कार्ययोजना’ सम्बन्धी उपत्यकाका स्थानीय जनप्रतिनिधिसँगको छलफल कार्यक्रममा मन्त्री चौधरीले ऐनलाई प्रभावकारी रूपमा कार्यान्वयन गर्न लागिएको जानकारी दिएकी हुन्।

मन्त्री चौधरीका अनुसार उपभोक्तालाई स्वस्थ, स्वच्छ र सुरक्षित मासु उपलब्ध गराउने उद्देश्यले पशु वध तथा मासु बिक्री वितरणमा कानुनी मापदण्ड अनिवार्य गरिनेछ। त्यसका लागि काठमाडौं उपत्यकाका स्थानीय तहसँग समन्वय गरी ऐन कार्यान्वयनलाई प्रभावकारी बनाउने तयारी गरिएको उनले बताइन्।

उनले पशु वधशाला सञ्चालन, पशुको स्वास्थ्य परीक्षण तथा मासुको गुणस्तर जाँचलाई व्यवस्थित बनाउन आवश्यक कदम चालिने बताइन्। उपभोक्ताको स्वास्थ्यसँग प्रत्यक्ष जोडिएको विषय भएकाले मासुको उत्पादनदेखि बिक्री वितरणसम्मका प्रक्रियालाई कानुनी दायरामा ल्याउनुपर्नेमा उनले जोड दिइन्।

मन्त्रालयका अनुसार ऐन कार्यान्वयनका क्रममा स्थानीय तहको भूमिका महत्वपूर्ण रहनेछ। स्थानीय तहसँगको समन्वयमा वधशाला व्यवस्थापन, पशु स्वास्थ्य परीक्षण तथा मासु निरीक्षणलाई प्रभावकारी बनाउने योजना अघि बढाइनेछ।

मंसिर १ गतेदेखि ऐन अनिवार्य रूपमा कार्यान्वयनमा आएपछि काठमाडौं उपत्यकामा अस्वस्थ वा परीक्षणबिनाको मासु बिक्री वितरणमा कडाइ हुने अपेक्षा