ओमानमाथि नेपालको शानदार जित, ११३ रनले पराजित

बिरगंज, पर्सा, २७ असोज 

आईसीसी विश्वकप लिग–२ अन्तर्गत नेपालको अन्तिम शृंखलाको दोस्रो खेलमा नेपालले ओमानलाई ११३ रनले पराजित गरेको छ। ओमानको अल अमेरत क्रिकेट मैदानमा भएको खेलमा नेपालले दिएको २६४ रनको लक्ष्य पछ्याएको ओमान ४० ओभरमा १५० रनमै अलआउट भयो।

टस जितेर पहिले ब्याटिङ गरेको नेपालले निर्धारित ५० ओभरमा ८ विकेट गुमाउँदै २६३ रन बनाएको थियो। जवाफमा ओमानले ४० ओभरसम्म पनि टिक्न नसक्दा नेपालले फराकिलो जित हात पारेको हो।

ओमानका लागि कप्तान विनायक शुक्लाले सर्वाधिक ७७ रन बनाए। उनले ८३ बलमा ६ चौका र एक छक्का प्रहार गरे। ओमानका ब्याटरहरू लगातार आउट भइरहँदा शुक्लाले एकतर्फबाट पारी सम्हाल्ने प्रयास गरेका थिए। उनले सातौँ विकेटका लागि जय ओडेरासँग ८३ रनको साझेदारी गरे। तर, दीपेन्द्रसिंह ऐरीले उक्त साझेदारी तोडेपछि ओमानको इनिङ्स धराशायी बन्यो।

जय ओडेराले २५ रन बनाउँदा ओपनर जतिन्दर सिंहले १८ रन जोडे। त्यसबाहेक ओमानका अन्य ब्याटरले दोहोरो अंकमा रन बनाउन सकेनन्।

नेपालका लागि नन्दन यादव र सन्दीप लामिछानेले समान तीन–तीन विकेट लिए। दीपेन्द्रसिंह ऐरीले दुई विकेट लिँदा करण केसी र ललित राजवंशीले एक–एक विकेट हात पारे।

रोहितको अर्धशतक, करणको विस्फोटक ब्याटिङ

नेपालको इनिङ्समा कप्तान रोहितकुमार पौडेलले सर्वाधिक ६१ रन बनाए। उनले ६७ बलमा तीन चौका र एक छक्का प्रहार गरे। चौथो विकेटका लागि रोहित र वसिर अहमदले ८६ रनको साझेदारी गर्दै नेपालको मध्यक्रम सम्हालेका थिए।

२७ ओभरमा तीन विकेट गुमाएर १०० रन बनाएको नेपालका लागि यी दुई ब्याटरको साझेदारी महत्त्वपूर्ण बनेको थियो। वसिरले ३७ रन बनाए।

नेपालका ओपनर अर्जुन कुमालले ४० रन बनाए भने इशान पाण्डेले ३७ रन जोडे। दोस्रो विकेटका लागि अर्जुन र इशानले ६४ रनको साझेदारी गरेका थिए। अर्का ओपनर आसिफ शेख भने चार रनमा आउट भए।

दीपेन्द्रसिंह ऐरीले २२ रन बनाउँदा सन्दीप जोराले १० रन जोडे।

अन्तिम ओभरहरूमा करण केसीले आक्रामक ब्याटिङ गर्दै नेपालको स्कोर उकासे। उनले १६ बलमा ४० रन बनाए। ४९औँ ओभरमा हुसैन शाहलाई लगातार तीन छक्का प्रहार गरेका करणले उक्त ओभरमा नेपालका लागि २५ रन जोडे। नन्दन यादव सात रनमा अविजित रहे।

ओमानका लागि शाह फैजल, सकिल अहमद र करण सोनाभले समान दुई–दुई विकेट लिए। हुसैन शाहले एक विकेट हात पारे।

अंकतालिकामा नेपाललाई फाइदा

यसअघि नेपालले पहिलो खेलमा क्यानडालाई २४ रनले पराजित गरेको थियो। लगातार दोस्रो जितसँगै नेपालले विश्वकप लिग–२ को अंकतालिकामा थप दुई अंक जोडेको छ।

नेपालले ३४ खेलबाट २८ अंक जोड्दै अंकतालिकाको छैटौँ स्थानमा रहेको छ। ओमानमाथिको फराकिलो जितले नेपालको शृंखला सुखद बनाएको छ।