११ वर्षीय राजेश गुप्ता तीन दिनदेखि बेपत्ता, भारतमा मृत अवस्थामा फेला

बारा — विश्रामपुर गाउँपालिका–३ निवासी राजकुमार गुप्ताका ११ वर्षीय छोरा मिठु भन्ने राजेश गुप्ता तीन दिनअघि घरबाट हराएका थिए। उनको खोजीका लागि नेपाल प्रहरीले अनुसन्धान गरिरहेको अवस्थामा राजेश भारतको रक्सौल प्रखण्डअन्तर्गत अहिर्वा पञ्चायत–१, सिंगही नदीको खोलामा मृत अवस्थामा फेला परेको जनाइएको छ।

Nirman

मृत अवस्थामा फेला परेका बालकको पहिचानका लागि उनकी आमालाई बोलाई देखाउँदा आफ्नै छोरा राजेश गुप्ता भएको पुष्टि भएको बताइएको छ।

भारतको ११२ नम्बर प्रहरी टोलीले शवलाई आफ्नो नियन्त्रणमा राखी घटनाबारे अनुसन्धान गरिरहेको र अनुसन्धानपछि नेपाल प्रहरीलाई जिम्मा लगाउने जनाएको छ।

घटनाबारे नेपाल प्रहरीले समेत अनुसन्धान अघि बढाएको छ। प्रहरीले केही व्यक्तिलाई अनुसन्धानको घेरामा राखी घटनाको कारण र बालकको मृत्यु कसरी भयो भन्ने विषयमा थप अनुसन्धान गरिरहेको जनाइएको छ।

घटनाबारे थप विवरण अनुसन्धानपछि खुल्ने प्रहरीले जनाएको छ।