अमरेश सिंहको गगन थापामाथि राजनीतिक प्रहार : ‘२.० को खोल ओढ्दैमा कोही इमानदार हुँदैन’

बिरगंज, पर्सा, १७ कार्तिक 

काठमाडौं । राष्ट्रिय स्वतन्त्र पार्टी (रास्वपा) का सांसद अमरेश कुमार सिंहले नेपाली कांग्रेसका सभापति गगन थापालाई लक्षित गर्दै कडा राजनीतिक टिप्पणी गरेका छन्। उनले सार्वजनिक रूपमा चर्चामा रहेको १८ करोड रुपैयाँको लेनदेनसम्बन्धी विषयलाई संकेत गर्दै थापामाथि प्रश्न उठाएका हुन्।

सोमबार सामाजिक सञ्जालमार्फत आफ्नो धारणा सार्वजनिक गर्दै सांसद सिंहले ‘२.०’ को आवरणले मात्र कसैलाई इमानदार प्रमाणित गर्न नसक्ने टिप्पणी गरेका छन्।

‘मैले पहिले नै भन्दै आएको थिएँ, २.० को खोल ओढ्दैमा कोही इमानदार हुँदैन,’ उनले लेखेका छन्।

सभापति बन्नका लागि न्यायिक प्रक्रिया र न्यायमाथि नै पैसाको प्रभाव पार्न खोजिएको भन्ने सार्वजनिक समाचारप्रति संकेत गर्दै सिंहले यस्ता आरोप लागेका व्यक्ति सत्तामा पुगेपछि के गर्लान् भन्दै प्रश्न गरेका छन्।

‘आफू सभापति बन्नकै लागि न्याय र न्यायिक प्रक्रियामाथि पैसाको प्रभाव पार्न खोज्ने व्यक्ति सत्तामा पुगेपछि के गर्ला ?’ उनले प्रश्न गरेका छन्।

उनले उक्त विषय सत्य भए जनताले गम्भीरतापूर्वक सोच्नुपर्ने धारणा राखेका छन्। सुशासनको नारा दिएर जनतालाई भ्रममा पार्ने तर पर्दापछाडि शक्ति, पैसा र बिचौलियाको चलखेल गर्ने प्रवृत्तिबाट मुलुकको भविष्य सुरक्षित हुन नसक्ने उनको टिप्पणी छ।

सांसद सिंहले सार्वजनिक भएका समाचारको निष्पक्ष छानबिन गरी सत्यतथ्य बाहिर ल्याउन पनि माग गरेका छन्।

‘विभिन्न सञ्चार माध्यममा आएका समाचार सत्य भए दोषीमाथि कानुनअनुसार कठोर कारबाही होस्, असत्य भए तथ्यसहित जनतालाई स्पष्ट पारियोस्,’ उनले लेखेका छन्।

उनले राजनीतिक नेतृत्वले अब जनतालाई भाषण र आश्वासन मात्र नभई आफ्नो कामको जवाफ र हिसाब दिनुपर्ने बताएका छन्।

सांसद सिंहको यो टिप्पणीले १८ करोड रुपैयाँको लेनदेनसम्बन्धी सार्वजनिक चर्चालाई लिएर राजनीतिक वृत्तमा थप बहस सिर्जना गर्ने देखिएको छ। यद्यपि, उक्त विषयमा लगाइएका आरोप र समाचारमा आएका दाबीहरूको स्वतन्त्र पुष्टि तथा आधिकारिक छानबिनको निष्कर्ष आउन बाँकी छ।