बाराको अमलेखगञ्ज बाट ठुलो परिमाणमा ट्रामाडोल लागुऔषध सहित युवक पक्राउ

२३ भदौ। बाराको जीतपुरसिमरा उपमहानगरपालिका–२१ स्थित वडा कार्यालय नजिकै पूर्व–पश्चिम राजमार्गबाट ठूलो परिमाणमा लागूऔषध ट्रामाडोलसहित एक युवक पक्राउ परेका छन्।

पक्राउ पर्नेमा पर्साको वीरगन्ज महानगरपालिका–१६ निवासी अन्दाजी १९ वर्षीय आनन्द चौरसिया रहेका छन्।

प्रहरीका अनुसार पूर्व–पश्चिम राजमार्गमा सवारीसाधन जाँच गर्ने क्रममा वीरगन्जबाट चितवनतर्फ जाँदै गरेको ना.५ ख ७६२३ नम्बरको यात्रुवाहक बस रोकी जाँच गरिएको थियो। सो क्रममा बसको हुड र्‍याकमा राखिएका दुईवटा शंकास्पद झोला फेला परेपछि प्रहरीले ती झोलाको जाँच गरेको थियो।

जाँच गर्दा झोलाभित्र ट्रामाडोल हाइड्रोक्लोराइडका १८ हजार ३ सय क्याप्सुल बरामद भएको प्रहरीले जनाएको छ।

बरामद लागूऔषधसहित चौरसियालाई नियन्त्रणमा लिएर आवश्यक कानुनी प्रक्रिया अघि बढाइएको प्रहरीले जनाएको छ। घटनाबारे थप अनुसन्धान भइरहेको प्रहरीको भनाइ छ।