क्लार्क क्यासिनोको एक महिनाको सीसीटीभी फुटेज जाँच गर्न माग

वीरगंज , भदौ २३ –

वीरगंजस्थित क्लार्क क्यासिनोको पछिल्लो एक महिनाको सीसीटीभी फुटेज निकालेर अध्ययन गर्न स्थानीयवासीले जिल्ला प्रहरी कार्यालय पर्सासँग माग गरेका छन् ।

सामाजिक सञ्जालमार्फत गरिएको मागमा क्यासिनोमा विभिन्न समयमा जनप्रतिनिधि तथा स्थानीय तहका प्रमुखसमेत पुग्ने गरेको दाबी गर्दै एक महिनाको सीसीटीभी फुटेज अध्ययन गरेमा क्यासिनोमा आउने–जाने व्यक्ति तथा जुवामा संलग्न भएको भनिएका व्यक्तिबारे थप तथ्य बाहिर आउन सक्ने उल्लेख गरिएको छ ।

स्थानीयवासीले प्रहरीले सीसीटीभी फुटेज अनुसन्धान गरी आवश्यक छानबिन गरेमा क्यासिनोसँग सम्बन्धित घटनाको वास्तविकता पत्ता लगाउन सहयोग पुग्ने बताएका छन् ।

यसैबीच, क्यासिनोसम्बन्धी पछिल्लो घटनामा पर्सा प्रहरीले अनुसन्धान अघि बढाइरहेको छ । प्रहरीले सीसीटीभी फुटेजबारे हालसम्म कुनै औपचारिक धारणा सार्वजनिक गरेको छैन । सामाजिक सञ्जालमा गरिएका आरोप तथा दाबीहरूको स्वतन्त्र पुष्टि हुन बाँकी छ ।