मलेशियामा बितेका पर्सागढीका थारुको शव नेपाल ल्याउन सांसद कानुले थाले पहल

वीरगन्ज,२९भदाैं:पर्सा क्षेत्र नम्बर २ का सांसद सुशील साह कानुले पर्सागढी नगरपालिका–९ बडेर्वाका शिव महतो थारुका छोरा ध्रुब महतो थारुको मलेसियामा भएको दुःखद निधनप्रति गहिरो दुःख व्यक्त गर्दै शोकसन्तप्त परिवारजनलाई भेटेर समवेदना व्यक्त गरेका छन्।

मलेसियामा चार दिनअघि ध्रुब महतो थारुको निधन भएको खबर पाएलगत्तै सांसद कानुले सोमबार उनको घरमा पुगेर परिवारजन तथा स्थानीयवासीसँग भेटघाट गरेका हुन्।

भेटका क्रममा सांसद कानुले दुःखको यस घडीमा आफू परिवारको साथमा रहेको बताउँदै धैर्य धारण गर्न आग्रह गरे।

सांसद कानुले मलेसियामा निधन भएका ध्रुब महतो थारुको शव यथाशीघ्र नेपाल ल्याउन आवश्यक पहल तथा समन्वयका लागि आफू सक्रिय रूपमा लागिरहेको बताए । शव नेपाल ल्याउने प्रक्रियामा सम्बन्धित निकाय तथा सरोकारवाला पक्षसँग आवश्यक समन्वय गरिने उनले बताए ।

विदेशमा रोजगारीका क्रममा परिवारका सदस्य गुमाउनुपर्दा परिवारजनमा परेको पीडाप्रति संवेदनशील हुँदै सांसद कानुले मृतकको शव नेपाल ल्याउने कार्यलाई प्राथमिकताका साथ अघि बढाउने प्रतिबद्धता व्यक्त गरे।