परवानीपुर–२ मा बर्थिङ सेन्टर सञ्चालन

बारा , १० असोज

बाराको परवानीपुर गाउँपालिका–२ स्थित रामपुर स्वास्थ्य चौकीमा बर्थिङ सेन्टर सञ्चालनमा आएको छ। स्थानीयस्तरमै सुरक्षित तथा सहज प्रसूति सेवा उपलब्ध गराउने उद्देश्यले स्थापना गरिएको बर्थिङ सेन्टरको गाउँपालिका अध्यक्ष रामक्षत्री प्रसाद कुर्मीले रिबन काटेर औपचारिक रूपमा उद्घाटन गर्दै सञ्चालनमा ल्याएका हुन्।

बर्थिङ सेन्टर सञ्चालनमा आएसँगै परवानीपुर–२ लगायत आसपासका गर्भवती महिलाले प्रसूति सेवाका लागि टाढा जानुपर्ने बाध्यता कम हुने गाउँपालिकाले जनाएको छ। स्वास्थ्य संस्थामै सुरक्षित रूपमा सुत्केरी गराउने वातावरण तयार भएपछि ग्रामीण तथा आर्थिक रूपमा कमजोर परिवारका महिलालाई विशेष राहत पुग्ने अपेक्षा गरिएको छ।

बर्थिङ सेन्टर उद्घाटन कार्यक्रममा गाउँपालिकाका प्रमुख प्रशासकीय अधिकृत मुन्ना साह रौनियार, वडा नं. २ का वडा अध्यक्ष महमदनुरुल होदा अंसारी, स्वास्थ्य शाखा प्रमुख जयकृष्ण मिश्र, स्वास्थ्यकर्मी, सुरक्षाकर्मी, वडा तथा गाउँपालिकाका कर्मचारी तथा सञ्चारकर्मीहरूको उपस्थिति रहेको थियो।

गाउँपालिकाका अनुसार बर्थिङ सेन्टरबाट गर्भवती तथा सुत्केरी महिलालाई विभिन्न सुविधा उपलब्ध गराइनेछ। सेवा लिन आउने महिलाका लागि सुत्केरी सेवा पूर्ण रूपमा निःशुल्क हुनेछ।

त्यसैगरी, बर्थिङ सेन्टरमा सुत्केरी हुने आमालाई यातायात खर्चबापत १ हजार रुपैयाँ उपलब्ध गराइने व्यवस्था गरिएको छ। नियमित गर्भजाँचलाई प्रोत्साहन गर्ने उद्देश्यले स्वास्थ्य संस्थामा प्रोटोकलअनुसार चार पटक गर्भजाँच गराई सोही बर्थिङ सेन्टरमा सुत्केरी गराउने महिलालाई थप ८ सय रुपैयाँ प्रोत्साहन रकमसमेत उपलब्ध गराइने गाउँपालिकाले जनाएको छ।

गर्भवती तथा सुत्केरी महिलालाई स्वास्थ्य संस्थासम्म ल्याउन तथा घरसम्म लैजानका लागि निःशुल्क एम्बुलेन्स सेवा उपलब्ध गराउने व्यवस्था पनि गरिएको छ। यसले आर्थिक अवस्था कमजोर भएका तथा यातायातको सहज पहुँच नभएका परिवारलाई प्रत्यक्ष राहत पुग्ने अपेक्षा गरिएको छ।

बर्थिङ सेन्टरमा सुत्केरी हुने प्रत्येक आमालाई आमा तथा नवजात शिशुका लागि आवश्यक कपडा समेटिएको एक थान न्यानो सोला समेत निःशुल्क उपलब्ध गराइने व्यवस्था गरिएको छ।

गाउँपालिकाले स्थानीय तहमा प्रसूति सेवा विस्तारसँगै गर्भवती महिलालाई नियमित गर्भजाँच गराउन र सम्भव भएसम्म स्वास्थ्य संस्थामै सुत्केरी गराउन प्रोत्साहित गर्ने नीति लिएको जनाएको छ। बर्थिङ सेन्टर सञ्चालनले मातृ तथा नवजात शिशुको स्वास्थ्य सुरक्षामा समेत योगदान पुग्ने विश्वास गरिएको छ।

स्थानीयस्तरमै बर्थिङ सेन्टर सञ्चालनमा आएपछि प्रसूति सेवाका लागि अन्यत्र जानुपर्ने बाध्यता कम हुनुका साथै समयमै स्वास्थ्य सेवा प्राप्त गर्न सहज हुने अपेक्षा गरिएको छ। विशेषगरी आकस्मिक अवस्थामा एम्बुलेन्स सेवा उपलब्ध हुने भएकाले गर्भवती महिलाको सुरक्षित प्रसूति व्यवस्थापनमा सहयोग पुग्ने गाउँपालिकाको भनाइ छ।