पत्रकार पक्राउ र सञ्चारगृहमा प्रहरी हस्तक्षेपविरुद्ध माइतीघरमा पत्रकारहरूको प्रदर्शन

काठमाडौं । पत्रकार पक्राउ, सञ्चारगृहमा धरपकड तथा न्यूजरुममा सरकार र प्रहरीको हस्तक्षेप भएको भन्दै नेपाल पत्रकार महासंघको आह्वानमा काठमाडौंको माइतीघर मण्डलामा पत्रकारहरूले प्रदर्शन गरेका छन्।

वर्षा र झरीको समेत प्रवाह नगरी प्रदर्शनमा उत्रिएका पत्रकारहरूले प्रेस स्वतन्त्रताको रक्षा, पत्रकारको सुरक्षा तथा सञ्चारगृहमा प्रहरी हस्तक्षेप बन्द गर्न माग गर्दै नाराबाजी गरेका छन्।

प्रदर्शनमा सहभागी पत्रकारहरूले पत्रकार पक्राउ गर्ने, सञ्चारगृहमा प्रहरी परिचालन गर्ने तथा न्यूजरुममा हस्तक्षेप गर्ने कार्यले प्रेस स्वतन्त्रता र स्वतन्त्र पत्रकारितामाथि असर पर्ने भन्दै विरोध जनाएका छन्।

प्रदर्शनलाई नेपाल पत्रकार महासंघका पूर्ववरिष्ठ उपाध्यक्ष रमेश विष्ट, वरिष्ठ पत्रकार देवेन्द्र चुडाललगायतले सम्बोधन गरेका थिए।

सम्बोधनका क्रममा उनीहरूले पत्रकारमाथि हुने धरपकड, सञ्चारगृहमा प्रहरी हस्तक्षेप तथा समाचार कक्षमा सरकारी हस्तक्षेप रोक्नुपर्ने माग उठाएका थिए।

पत्रकार महासंघको आह्वानमा आयोजित प्रदर्शनमार्फत पत्रकारहरूले प्रेस स्वतन्त्रताको सम्मान गर्न र सञ्चारमाध्यमलाई स्वतन्त्र रूपमा काम गर्ने वातावरण सुनिश्चित गर्न सरकारसँग माग गरेका छन्।