प्रधानमन्त्री शाहसँग अमेरिकी कार्यवाहक राजदूत बोल्डिनको भेट, विपद् व्यवस्थापनदेखि अमेरिकी लगानीसम्म छलफल

काठमाडौं । प्रधानमन्त्री वालेन्द्र शाह र नेपालका लागि अमेरिकी कार्यवाहक राजदूत मेगन बोल्डिनबीच आइतबार सिंहदरबारमा शिष्टाचार भेटवार्ता भएको छ । भेटवार्तामा पछिल्लो विपद्को अवस्था, अमेरिकी सहयोग, जलवायु परिवर्तनका असर तथा नेपालमा अमेरिकी लगानीका सम्भावनाबारे छलफल भएको प्रधानमन्त्री तथा मन्त्रिपरिषद्को कार्यालयले जनाएको छ।

भेटमा प्रधानमन्त्री शाहले विपद्को कठिन परिस्थितिमा नेपालप्रति अमेरिकी सरकारबाट व्यक्त ऐक्यबद्धता र सहयोगका लागि धन्यवाद व्यक्त गरे । उनले विपद्का कारण नेपालीसँगै विदेशी नागरिकसमेत प्रभावित भएको उल्लेख गर्दै जलवायु परिवर्तनका कारण यस्ता घटनाको सामना गर्नुपरेको बताए।

प्रधानमन्त्री शाहले जलवायुजन्य विपद्को जोखिम न्यूनीकरण तथा त्यसबाट हुने क्षति सम्बोधन गर्न विश्वव्यापी सहकार्य र सामूहिक प्रयासलाई थप सुदृढ गर्नुपर्नेमा जोड दिए ।

भेटका क्रममा प्रधानमन्त्री शाहले नेपालको पर्यटन क्षेत्रको सम्भावनाबारे चर्चा गर्दै पर्यटनको विकासमार्फत नेपाल र अमेरिकाबीच पारस्परिक लाभ हासिल गर्न सकिने बताए । उनले नेपालमा अमेरिकी लगानीका लागि सरकार सधैँ सकारात्मक र स्वागतयोग्य रहेको धारणा राखे ।

कार्यवाहक राजदूत बोल्डिनले रसुवामा आएको बाढीबाट भएको जनधनको क्षतिप्रति दुःख व्यक्त गर्दै प्रभावित परिवार तथा समुदायप्रति समवेदना प्रकट गरिन् । उनले विपद्को यस कठिन घडीमा अमेरिकी सरकार नेपाल सरकार र नेपाली जनताको साथमा रहेको बताइन्।

बोल्डिनले राहत, पुनःस्थापना तथा पुनर्निर्माणका लागि नेपालले अघि बढाउने प्रयासमा आवश्यक सहयोग र सहकार्य गर्न अमेरिकी सरकार तयार रहेको समेत जानकारी गराइन्।