रौतहटमा पेट्रोल बोकेको ट्याङ्कर दुर्घटना, आगलागीपछि पूर्ण रूपमा नष्ट

रोशन कुमार शाह

रौतहट,साउन २१ — रौतहटको गुजरा नगरपालिका–३ धनसार पुल नजिक महेन्द्र राजमार्गमा पेट्रोल बोकेको ट्याङ्कर दुर्घटनापछि आगलागी हुँदा ट्याङ्कर पूर्ण रूपमा जलेर नष्ट भएको छ। घटनामा भने कुनै मानवीय क्षति भएको छैन।

प्रहरीका अनुसार बिहीबार बिहान करिब ५:३० बजे बाराको अमलेखगञ्जबाट सर्लाहीतर्फ जाँदै गरेको मधेश प्रदेश ०३–००१ ख ७८११ नम्बरको पेट्रोल बोकेको ट्याङ्कर मृगलाई बचाउने क्रममा अनियन्त्रित भई सडकको दाहिने किनारमा पल्टिएको थियो। पल्टिएलगत्तै ट्याङ्करमा अचानक आगलागी भएको प्रहरीले जनाएको छ।

घटनाको सूचना प्राप्त हुनासाथ इलाका प्रहरी कार्यालय चन्द्रनिगाहपुरबाट प्रहरी नायब उपरीक्षक सत्य नारायण थापाको कमाण्डमा १० जना तथा जिल्ला ट्राफिक प्रहरी कार्यालय चपुरबाट प्रहरी निरीक्षक राजेन्द्र थापा मगरको कमाण्डमा ५ जना गरी १५ जना प्रहरी घटनास्थलमा खटिएका थिए।

चन्द्रपुर नगरपालिका र निजगढ बाराको दमकलको सहयोगमा बिहान करिब ६:५० बजे आगो पूर्ण रूपमा नियन्त्रणमा लिइएको प्रहरीले जनाएको छ।

दुर्घटनामा ट्याङ्कर पूर्ण रूपमा क्षति भए पनि कुनै मानवीय क्षति नभएको र महेन्द्र राजमार्गमा सवारी आवागमन सामान्य अवस्थामा रहेको छ।

ट्याङ्कर चालक बारा जिल्लाको सिमरा उपमहानगरपालिका–११ निवासी अन्दाजी २५ वर्षीय समिर गुरुङ लाई जिल्ला ट्राफिक प्रहरी कार्यालय चपुरको नियन्त्रणमा राखी घटनाबारे थप अनुसन्धान भइरहेको प्रहरीले जनाएको छ।

घटनास्थल इलाका प्रहरी कार्यालय चन्द्रनिगाहपुरबाट करिब १३ किलोमिटर पश्चिममा पर्छ।