रौतहटमा पोखरीमा डुबेर २८ वर्षीय युवकको मृत्यु

रौतहट । रौतहटको फतुवा विजयपुर नगरपालिका–१ बैरगिनिया टोलमा पोखरीमा डुबेर एक युवकको मृत्यु भएको छ।

मृत्यु हुनेमा स्थानीय रामहरी दासका छोरा अन्दाजी २८ वर्षीय राजेश दास रहेको प्रहरीले जनाएको छ। दासलाई स्थानीय अरबिन्द यादवको पोखरीमा घोप्टो परेको अवस्थामा मृत फेला पारिएको हो।

प्रहरीका अनुसार घटनाबारे स्थानीयले बिहान १०:०५ बजे इलाका प्रहरी कार्यालय सन्तपुर लक्ष्मिनियामा जानकारी गराएका थिए। सूचना प्राप्त भएपछि प्रहरी नायब निरीक्षक विनोद पासवानको कमाण्डमा प्रहरी टोली घटनास्थल पुगेको थियो।

घटनाको थप अनुसन्धान तथा आवश्यक कानुनी प्रक्रिया अगाडि बढाउन इलाका प्रहरी कार्यालय लक्ष्मिनिया विजयपुरबाट प्रहरी निरीक्षक रादेश कुमार खत्रीको कमाण्डमा SOCO सहितको टोली घटनास्थलमा खटिएको प्रहरीले जनाएको छ।

घटनाको कारणबारे थप अनुसन्धान भइरहेको प्रहरीले जनाएको छ।