ऋण नतिर्ने सहकारीका ऋणीलाई अन्तिम चेतावनी: साँवा-ब्याज नतिरे कानुनी कारबाही हुने

२२ बैशाख, काठमाडौँ । समस्याग्रस्त सहकारी व्यवस्थापन समितिको कार्यालयले विभिन्न समयमा समस्याग्रस्त घोषित सहकारीहरूबाट ऋण लिएर हालसम्म नतिर्ने ऋणीहरूलाई तत्काल कर्जा चुक्ता गर्न कडा निर्देशन दिएको छ ।

समितिले मङ्गलबार एक सार्वजनिक सूचना जारी गर्दै ऋणीहरूलाई आफूले लिएको कर्जाको साँवा, ब्याज र हर्जानासहितको सम्पूर्ण रकम समयमै भुक्तानी गरी जिम्मेवारी पूरा गर्न ताकेता गरेको हो । सहकारी ऐन, २०७४ को दफा १०४ बमोजिम सम्पत्ति व्यवस्थापन र दायित्व भुक्तानीको प्रक्रियालाई तीव्रता दिन समितिले यस्तो कदम चालेको बुझिएको छ ।

पीडित बचतकर्ताहरूको रकम फिर्ता गर्ने कार्यलाई प्राथमिकतामा राखेको समितिले ऋणीहरूबाट असुली हुनुपर्ने रकम सङ्कलन नभएसम्म दायित्व फर्स्योट गर्न कठीन हुने स्पष्ट पारेको छ । यसका साथै, समितिले समस्याग्रस्त सहकारीका सञ्चालक, व्यवस्थापक, ऋणी सदस्य तथा जमानीकर्ताहरूलाई समेत तत्काल समितिको कार्यालयमा सम्पर्क राख्न आह्वान गरेको छ ।

तोकिएको समयभित्र कर्जा भुक्तानी नगर्ने वा सम्पर्कमा नआउने व्यक्तिहरूलाई कानुन बमोजिम कडा कारबाहीको प्रक्रिया अगाडि बढाइने चेतावनी समेत सूचनामा दिइएको छ ।