संयुक्त राष्ट्रसङ्घको महासभामा नेपालको प्रतिनिधित्व गरेर प्रधानमन्त्री शाह स्वदेश फर्किए

काठमाडौं । संयुक्त राष्ट्रसङ्घको ८१औँ महासभामा नेपालको प्रतिनिधित्व गर्दै प्रधानमन्त्री वालेन्द्र शाह स्वदेश फर्किनुभएको छ।

१४ सदस्यीय नेपाली प्रतिनिधिमण्डलको नेतृत्व गर्दै संयुक्त राष्ट्रसङ्घको महासभामा सहभागी हुन गत असोज ६ गते कतारको दोहा हुँदै अमेरिकाको न्युयोर्क प्रस्थान गर्नुभएका प्रधानमन्त्री शाह आज न्युयोर्कबाट दोहा हुँदै काठमाडौं फर्किनुभएको हो। उहाँ केहीबेरअघि त्रिभुवन अन्तर्राष्ट्रिय विमानस्थलमा अवतरण गर्नुभएको हो।

भ्रमणका क्रममा प्रधानमन्त्री शाहले संयुक्त राष्ट्रसङ्घका महासचिव एन्टोनियो गुटेरेससँग शिष्टाचार भेटवार्ता गर्नुभएको थियो। नेपाली समयअनुसार असोज ९ गते शुक्रबार बिहान भएको भेटवार्तापछि प्रधानमन्त्री शाहले संयुक्त राष्ट्रसङ्घको ८१औँ महासभालाई नेपालको तर्फबाट सम्बोधन गर्नुभएको थियो।

महासभालाई सम्बोधन गर्दै प्रधानमन्त्री शाहले नेपालको धारणा अन्तर्राष्ट्रिय समुदायसमक्ष प्रस्तुत गर्नुभएको थियो। भ्रमणका क्रममा उहाँ न्युयोर्कस्थित नेपाली स्थायी नियोगमा आयोजित विभिन्न ब्रिफिङ तथा औपचारिक स्वागत समारोहमा समेत सहभागी हुनुभएको थियो।

प्रधानमन्त्री शाहको भ्रमण तथा महासभामा नेपालको सहभागिताबारे परराष्ट्र मन्त्रालयले आजै प्रेस ब्रिफिङ गर्ने तयारी गरेको छ। मन्त्रालयको ब्रिफिङपछि भ्रमणका क्रममा भएका भेटवार्ता, छलफल तथा उठाइएका विषयबारे थप विवरण सार्वजनिक हुने अपेक्षा गरिएको छ।