वीरगञ्जमा अवैध औषधि प्याकिङको धन्दा ! आर.पी. फार्मास्युटिकल्सका सञ्चालक चौहान प्रहरीको फन्दामा

वीरगञ्ज । वीरगञ्ज महानगरपालिका–११ श्रीपुरस्थित आर.पी. फार्मास्युटिकल्स प्रालिमा अवैध रूपमा औषधिजन्य वस्तु उत्पादन तथा स्टिकर लेबलिङ भइरहेको अवस्थामा फर्म सञ्चालक राहुल कुमार चौहानलाई प्रहरीले नियन्त्रणमा लिएको छ।

जिल्ला प्रहरी कार्यालय पर्साबाट प्रहरी नायब उपरीक्षक (डीएसपी) राजु कार्की र वडा प्रहरी कार्यालय श्रीपुरबाट प्रहरी निरीक्षक नवीन थापा मगरको संयुक्त टोलीले फर्ममा चेकजाँच तथा खानतलासी गरेको थियो। सो क्रममा फर्ममा अनुमति बिना औषधिजन्य वस्तु उत्पादन तथा स्टिकर लेबलिङ भइरहेको पाइएको प्रहरीले जनाएको छ।

खानतलासीका क्रममा भेटिएका औषधिजन्य सामग्री तथा अन्य आवश्यक प्रमाणसमेत नियन्त्रणमा लिइएको बताइएको छ। घटनास्थलमा औषधि व्यवस्था विभागका निरीक्षक मुकेश कुमार राउत, रवि चौधरी र अमर शर्मा तथा घरेलु तथा साना उद्योग कार्यालयका कर्मचारीसमेतको उपस्थिति रहेको थियो।

प्रहरीका अनुसार फर्म सञ्चालक चौहानलाई नियन्त्रणमा लिएर आवश्यक अनुसन्धान तथा कानुनी कारबाहीका लागि वडा प्रहरी कार्यालय श्रीपुरमा राखिएको छ।

फर्ममा कुन–कुन औषधिजन्य वस्तु उत्पादन तथा लेबलिङ भइरहेको थियो, त्यसका लागि आवश्यक अनुमति लिइएको थियो वा थिएन तथा कारोबारमा अन्य व्यक्तिको संलग्नता भए–नभएको विषयमा सम्बन्धित निकायले थप अनुसन्धान गरिरहेको जनाएको छ।