वीरगञ्जमा गहवामाईको चौथो रथयात्रा तयारी: अजय कुमार साहद्वारा उल्लेखनीय सहयोग

असार २६, वीरगञ्ज 

वीरगञ्जस्थित प्रसिद्ध शक्तिपीठ गहवामाईको चौथो विशाल रथयात्रा तथा महाप्रसाद भण्डाराको तयारी उत्साहका साथ अगाडि बढिरहेको छ। यस अवसरमा अनलाइन न्यूज दैनिकका सम्पादक तथा प्रकाशक अजय कुमार साहले उल्लेखनीय धार्मिक सहयोग प्रदान गर्नुभएको छ।

साहले आफ्नो बुवा बनारसी साह तुरहाको नाममा ३५ किलो शुद्ध घ्यू तथा दाई बिपिन साह तुराहाको नाममा ५६ भोग प्रसादका लागि आवश्यक सामग्री हस्तान्तरण गर्नुभएको छ। धार्मिक आस्था र सामाजिक उत्तरदायित्वलाई मध्यनजर गर्दै गरिएको यो सहयोगले स्थानीय समुदायमा सकारात्मक सन्देश प्रवाह गरेको छ।

गहवामाईको चौथो रथयात्रा असार ३२ गते बिहीबार भव्य रूपमा आयोजना गरिनेछ भने महाप्रसाद भण्डारा साउन १ गते सम्पन्न हुने कार्यक्रम रहेको छ। प्रत्येक वर्षझैं यसपटक पनि हजारौं श्रद्धालुहरूको सहभागिता रहने अपेक्षा गरिएको छ।

अजय कुमार साहले यसअघि पनि गहवामाईको धार्मिक कार्यक्रमहरूमा निरन्तर सहयोग गर्दै आउनु भएको छ। तेस्रो रथयात्रामा उहाँले हलुवा प्रसादका लागि ५५० किलो सुजी उपलब्ध गराउनु भएको थियो भने दोस्रो रथयात्रामा ५० वटा टिसर्ट र १५०० भन्दा बढी फ्रुटी वितरण गर्नुभएको थियो।

उहाँले यस्ता धार्मिक तथा सामाजिक कार्यमा सबैले आ–आफ्नो ठाउँबाट सहयोग गर्नुपर्ने सन्देश दिनुभएको छ। साहको यो निरन्तर सहयोगले धार्मिक सद्भाव र सामाजिक एकतालाई थप मजबुत बनाउने विश्वास लिइएको छ।