नागढुंगा सुरुङमार्गभित्र ओभरटेक गर्ने दुई माइक्रोबस कारबाहीमा

काठमाडौं । नागढुंगा सुरुङमार्गभित्र सवारीसाधन ओभरटेक गरी चलाएको भन्दै दुई माइक्रोबसलाई काठमाडौं उपत्यका ट्राफिक प्रहरी कार्यालयले कारबाही गरेको छ।

सोमबार सुरुङमार्गभित्र ट्राफिक नियम उल्लंघन गर्दै ओभरटेक गरेको पाइएपछि बा.प्र.०१–००६ ख ८८८० र बा.प्र.०१–००७ ख १७९४ नम्बरका माइक्रोबसलाई कारबाही गरिएको हो।

प्रहरीका अनुसार सुरुङमार्गभित्र ओभरटेक गर्दा दुर्घटनाको जोखिम बढ्ने भएकाले चालकले निर्धारित लेन र गति कायम राख्दै ट्राफिक नियमको पूर्ण पालना गर्नुपर्छ।

कारबाहीमा परेका चालक बलराम सिवाकोटी र बालकृष्ण श्रेष्ठलाई जनही ५ सय रुपैयाँ जरिवाना गरिएको काठमाडौं उपत्यका ट्राफिक प्रहरी कार्यालयले जनाएको छ।

ट्राफिक प्रहरीले नागढुंगा सुरुङमार्गमा सवारी चलाउँदा निर्धारित गति, लेन अनुशासन तथा अन्य ट्राफिक नियम पालना गर्न सबै चालकलाई आग्रह गरेको छ। साथै, सुरुङमार्गभित्र जथाभावी ओभरटेक नगर्न र सम्भावित दुर्घटनाबाट बच्न विशेष सावधानी अपनाउनसमेत अनुरोध गरिएको छ।

सुरुङमार्गजस्तो सीमित स्थानमा सानो लापरबाहीले पनि ठूलो दुर्घटना निम्त्याउन सक्ने भएकाले चालकले अनुशासित र सुरक्षित रूपमा सवारी सञ्चालन गर्नुपर्ने प्रहरीले जनाएको छ।