बाराबाट ५५ किलो गाँजासहित एक जना पक्राउ

बिरगंज, पर्सा, २५ असोज 

बारा । बाराको पचरौता नगरपालिकाबाट प्रहरीले ५५ किलो गाँजासहित एक जनालाई पक्राउ गरेको छ।

जिल्ला प्रहरी कार्यालय बाराका अनुसार पक्राउ पर्नेमा पचरौता नगरपालिका–३, रामनगर टोल निवासी अन्दाजी ४५ वर्षीय राजकिशोर प्रसाद यादव रहेका छन्।

प्रहरीका अनुसार इलाका प्रहरी कार्यालय सिम्रौनगढबाट खटिएको गस्ती टोलीले शनिबार राति पचरौता नगरपालिका–६ मा गस्ती गर्ने क्रममा यादवलाई चेकजाँच गरेको थियो। सोही क्रममा उनको साथबाट ५५ किलो गाँजा बरामद भएपछि प्रहरीले उनलाई नियन्त्रणमा लिएको हो।

गाँजासहित पक्राउ परेका यादवमाथि इलाका प्रहरी कार्यालय सिम्रौनगढबाट थप अनुसन्धान भइरहेको जिल्ला प्रहरी कार्यालय बाराका प्रवक्ता एवं प्रहरी नायब उपरीक्षक मीनबहादुर घलेले जानकारी दिएका छन्।

प्रहरीले घटनाबारे थप अनुसन्धान गरिरहेको जनाएको छ।