बिरगंज, पर्सा, २३ कार्तिक 

विराटनगर । मोरङको जहदा गाउँपालिकामा विवाहेत्तर प्रेम सम्बन्धका कारण उत्पन्न विवादले भयावह रूप लिएको छ। अर्का पुरुषसँग प्रेम सम्बन्ध रहेको खुलेपछि उत्पन्न विवादका क्रममा श्रीमतीले भारतीय प्रेमीसँग मिलेर आफ्नै श्रीमानको हत्या गरेको प्रहरीको प्रारम्भिक अनुसन्धानबाट खुलेको छ।

श्रीमानको हत्या गरेको आरोपमा प्रहरीले जहदा गाउँपालिका–२, मोहनपुरका ३५ वर्षीया कमली बास्के र भारतको बिहारस्थित कटिहार जिल्लाका २७ वर्षीय सुनील मिश्रलाई पक्राउ गरेको छ। हत्या गरिएका व्यक्ति कमलीका ४० वर्षीय श्रीमान् बुधराम सोरेन हुन्।

मोरङ प्रहरी प्रमुख एसपी कवित कटवालका अनुसार आइतबार राति करिब ९ बजे बुधरामको टाउकोमा फलामको रड प्रहार गरिएको थियो। रड प्रहारबाट गम्भीर घाइते भएका उनको घटनास्थलमै मृत्यु भएको थियो।

प्रहरीको प्रारम्भिक अनुसन्धानअनुसार कमली र भारतीय नागरिक सुनीलबीच प्रेम सम्बन्ध रहेको थियो। श्रीमतीको अर्का पुरुषसँग सम्बन्ध रहेको थाहा पाएपछि बुधराम र कमलीबीच विवाद उत्पन्न भएको प्रहरीको भनाइ छ। सोही विवादपछि प्रेम सम्बन्धलाई निरन्तरता दिन र त्यसबाट उत्पन्न समस्या हटाउन दुवै जनाले मिलेर बुधरामको हत्या गरेको प्रारम्भिक अनुसन्धानबाट खुलेको एसपी कटवालले जानकारी दिए।

घटनामा संलग्न रहेको आरोपमा प्रहरीले दुवै जनालाई फरक–फरक स्थानबाट पक्राउ गरेको हो। घटनाबारे सूचना पाएपछि प्रहरी चौकी मझारेबाट खटिएको टोलीले सुनीललाई घटनास्थलबाटै नियन्त्रणमा लिएको थियो।

घटनापछि फरार भएकी कमलीलाई भने प्रहरीले सोमबार बिहान करिब साढे ७ बजे घरबाट करिब एक किलोमिटर पश्चिमतर्फ खेतमा भाग्दै गरेको अवस्थामा फेला पारेको थियो।

प्रहरीले हत्यामा प्रयोग भएको फलामको रडसमेत बरामद गरेको छ। घटनाको प्रकृति, हत्याको योजना तथा दुवै आरोपितको भूमिकाबारे थप अनुसन्धान भइरहेको एसपी कटवालले बताए।

उनका अनुसार प्रारम्भिक अनुसन्धानमा विवाहेत्तर प्रेम सम्बन्ध लुकाउन प्रेमीसँग मिलेर श्रीमतीले श्रीमानको हत्या गरेको देखिएको छ। यद्यपि घटनाको विस्तृत तथ्य अनुसन्धानपछि थप स्पष्ट हुने प्रहरीले जनाएको छ।

मृतक बुधराम सोरेनको शव पोस्टमार्टमका लागि कोशी अस्पताल विराटनगर पठाइएको छ। पक्राउ परेका कमली र सुनीलविरुद्ध कर्तव्य ज्यानसम्बन्धी कसुरमा अनुसन्धान अघि बढाउने प्रहरीको तयारी छ।

बिरगंज, पर्सा, २३ कार्तिक 

बाराको जितपुरसिमरा उपमहानगरपालिका–६ घुसुकपुर टेंढामा पटका पड्काउने क्रममा १६ वर्षीय एक किशोर घाइते भएका छन्।

प्राप्त जानकारीअनुसार सोमबार राति करिब १०:३० बजे आफ्नै घरको आँगनमा पटका पड्काउने क्रममा महम्मद समसाद मिया देवानका १६ वर्षीय छोरा अफ्ताब मिया देवान घाइते भएका हुन्।

पटका पड्काउने क्रममा उनको संवेदनशील अंगमा जलन तथा चोट लागेको जनाइएको छ। घटनापछि उनलाई उपचारका लागि वीरगञ्जस्थित नारायणी अस्पताल लगिएको थियो।

प्रहरीका अनुसार घाइते किशोरको हाल नारायणी अस्पतालमा उपचार भइरहेको छ। उनको अवस्था मध्यम रहेको बताइएको छ।

घटनाबारे जानकारी प्राप्त हुनासाथ इलाका प्रहरी कार्यालय जितपुर, बाराबाट प्रहरी सहायक निरीक्षक तेजनारायण बैठाको कमाण्डमा प्रहरी टोली घटनास्थल पुगेको थियो।

पटका प्रयोगमा सावधानी अपनाउन आग्रह

चाडपर्व तथा उत्सवका समयमा पटका र अन्य विस्फोटकजन्य सामग्री प्रयोग गर्दा यस्ता दुर्घटनाको जोखिम बढ्ने भएकाले विशेष सतर्कता अपनाउन आवश्यक देखिएको छ।

विशेषगरी बालबालिका तथा किशोरकिशोरीलाई पटका पड्काउन नदिन र अभिभावकले विशेष निगरानी राख्न आवश्यक छ। क्षणिक मनोरञ्जनका लागि गरिने असावधानीले गम्भीर दुर्घटना निम्त्याउन सक्ने भएकाले सुरक्षित रूपमा चाडपर्व मनाउन सबैमा आग्रह गरिएको छ।

बिरगंज, पर्सा, २१ कार्तिक 

सिरहा । सिरहाको धनगढीमाई नगरपालिका–१० जिरोमाइलस्थित विश्वशान्ति एकेडेमीमा कार्यरत एक शिक्षक साढे तीन वर्षीया बालिकामाथि जबर्जस्ती करणी गरेको आरोपमा पक्राउ परेका छन्।

विद्यालयमा अध्यापनसँगै दैनिक प्रशासनिक जिम्मेवारीसमेत सम्हाल्दै आएका करिब २५ वर्षीय सौगात लुइँटेललाई जबर्जस्ती करणीसम्बन्धी कसुरमा प्रहरीले पक्राउ गरेको हो। उनलाई गत मंगलबार पक्राउ गरी सिरहा जिल्ला अदालतबाट म्याद थप गरेर थप अनुसन्धान भइरहेको प्रहरीले जनाएको छ।

सिरहा प्रहरीका अनुसार पीडित बालिकाको धरानस्थित बीपी कोइराला स्वास्थ्य विज्ञान प्रतिष्ठानमा स्वास्थ्य परीक्षण गराइएको छ। स्वास्थ्य परीक्षणपछि बालिकालाई परिवारको जिम्मा लगाइएको प्रहरीले जनाएको छ।

पीडित परिवारले प्रहरीमा दिएको जाहेरीअनुसार आरोपी शिक्षकले गत कात्तिक ८ देखि १२ गतेसम्म टिफिनको समयमा बालिकालाई विद्यालयको कार्यालयमा लगेर चकलेट दिने तथा विभिन्न प्रलोभन देखाउने गर्दै पटक–पटक यौन दुर्व्यवहार गरेको आरोप छ।

बालिकाले कात्तिक १७ गते रुँदै आफूमाथि भएको घटनाबारे परिवारलाई सुनाएपछि मात्र घटना सार्वजनिक भएको जाहेरीमा उल्लेख छ।

परिवारका अनुसार बालिकालाई पिसाब गर्नसमेत कठिनाइ हुन थालेपछि सुरुमा छालासम्बन्धी समस्या भएको आशंका गरिएको थियो। केही दिन विद्यालय नपठाउँदा समस्या कम हुने र पुनः विद्यालय पठाउँदा दोहोरिने भएपछि उनलाई अस्पताल लगिएको थियो। स्वास्थ्यकर्मीले परीक्षणका क्रममा यौन हिंसा भएको हुन सक्ने आशंका व्यक्त गरेपछि परिवारले बालिकासँग सोधपुछ गर्दा घटनाबारे जानकारी पाएको जनाएको छ।

जाहेरी फिर्ता लिन दबाब र धम्की दिएको परिवारको आरोप

आरोपी शिक्षक पक्राउ परेपछि पनि विद्यालय सञ्चालकले केही राजनीतिक दलका नेतामार्फत जाहेरी फिर्ता लिन आर्थिक प्रलोभन देखाउँदै दबाब र धम्की दिइरहेको पीडित परिवारको गुनासो छ।

परिवारका एक आफन्तका अनुसार प्रहरीमा किटानी जाहेरी दर्ता भइसकेर आरोपी पक्राउ पर्दासमेत विभिन्न माध्यमबाट आर्थिक प्रलोभन तथा दबाब दिने प्रयास भइरहेको छ।

यता, सिरहा प्रहरीका सूचना अधिकारी प्रहरी नायब उपरीक्षक रमेशबहादुर पालले पीडित परिवारले दिएको जबर्जस्ती करणीसम्बन्धी किटानी जाहेरी दर्ता गरी घटनाको अनुसन्धान भइरहेको जानकारी दिएका छन्।

निष्पक्ष अनुसन्धान र पीडितलाई न्याय दिन मानव अधिकारकर्मीको माग

यसैबीच, विद्यालयमै बालिकामाथि यौन हिंसा भएको घटना सार्वजनिक भएपछि महिला मानव अधिकार रक्षक राष्ट्रिय सञ्जालले गम्भीर ध्यानाकर्षण भएको जनाएको छ।

सञ्जालकी अध्यक्ष श्यामकुमारी साहले शुक्रबार जारी गरेको प्रेस विज्ञप्तिमार्फत घटनाको निष्पक्ष र प्रभावकारी अनुसन्धान गरी पीडित बालिकालाई न्याय सुनिश्चित गर्न माग गरेकी छन्।

विज्ञप्तिमा बालिकामाथि भएको यौन हिंसा मानव अधिकार, बालअधिकार तथा सम्मानपूर्वक बाँच्न पाउने अधिकारमाथिको गम्भीर उल्लंघन भएको उल्लेख गर्दै पीडितको सुरक्षा, संरक्षण र न्यायमा पहुँच सुनिश्चित गर्नु राज्यको दायित्व भएको जनाइएको छ।

अनुसन्धान तथा न्यायिक प्रक्रियामा कुनै पनि राजनीतिक, आर्थिक वा अन्य प्रकारको दबाब र प्रभाव पर्न नदिन, कानुनबमोजिम दोषी ठहर हुने व्यक्तिलाई हदैसम्मको कारबाही गर्न तथा पीडित बालिका र परिवारको गोपनीयता, सुरक्षा र सम्मानलाई प्राथमिकता दिन सञ्जालले आग्रह गरेको छ।

त्यस्तै, पीडित बालिकालाई आवश्यक मनोसामाजिक परामर्श, स्वास्थ्य उपचार तथा कानुनी सहायता उपलब्ध गराउन र न्याय प्राप्तिको प्रक्रियामा थप पीडा, धम्की, दबाब वा सामाजिक लाञ्छनाबाट जोगाउन सम्बन्धित निकायसँग माग गरिएको छ।

सञ्जालले स्थानीय सरकार, विद्यालय, प्रहरी तथा सम्बन्धित निकायलाई बालबालिकामाथि हुने यौन हिंसा रोकथाम र संरक्षणका लागि प्रभावकारी संयन्त्र निर्माण गर्नसमेत आग्रह गरेको छ।

बालबालिकामाथि हुने यौन हिंसा कुनै पनि अवस्थामा स्वीकार्य नहुने स्पष्ट पार्दै सञ्जालले पीडितको न्याय, सुरक्षा र सम्मानका पक्षमा निरन्तर आवाज उठाउने प्रतिबद्धता जनाएको छ।

बिरगंज, पर्सा, २१ कार्तिक 

बाराको जीतपुरसिमरा उपमहानगरपालिका–१५ डुमरवानास्थित सेजको खेतमा एक युवक मृत अवस्थामा फेला परेका छन्।

मृत फेला पर्नेमा ३० वर्षीय वीरेन्द्र माझी रहेका छन्। उनी पेशाले ट्र्याक्टर चालक रहेको बताइएको छ।

प्राप्त जानकारीअनुसार माझी शुक्रबार साँझ घरबाट बाहिरिएका थिए। तर शनिबार बिहान खेतमा काम गर्न पुगेका स्थानीय बासिन्दाले खेतको कुलोमा उनको शव देखेपछि प्रहरीलाई खबर गरेका थिए।

सूचना प्राप्त हुनासाथ प्रहरी घटनास्थल पुगेको थियो। घटनास्थलमा नयाँ कपडासहितको एउटा झोलासमेत फेला परेको प्रहरीले जनाएको छ।

माझीको मृत्यु के कारणले भएको हो भन्नेबारे अहिलेसम्म यकिन हुन सकेको छैन। प्रहरीले शवलाई पोस्टमार्टमका लागि प्रादेशिक अस्पताल कलैया पठाएको छ।

इलाका प्रहरी कार्यालय सिमराका प्रमुख प्रहरी नायब उपरीक्षक (डीएसपी) दयाकृष्ण भट्टका अनुसार घटनाबारे थप अनुसन्धान भइरहेको छ।

पोस्टमार्टम रिपोर्ट तथा प्रहरी अनुसन्धानपछि मात्रै मृत्युको वास्तविक कारण खुल्ने अपेक्षा गरिएको छ।