बूढानीलकण्ठमा प्रहरीको ठूलो अपरेसन, २० किलो सुन र पगाल्ने मेसिन बरामद

बिरगंज, पर्सा, २२ असोज 

काठमाडौं । काठमाडौंको बूढानीलकण्ठ क्षेत्रबाट प्रहरीले करिब २० किलो अवैध सुनसहित दुई जना चिनियाँ नागरिकलाई पक्राउ गरेको छ। उपत्यका अपराध अनुसन्धान कार्यालयको टोलीले बिहीबार विशेष सूचनाका आधारमा सञ्चालन गरेको अपरेसनका क्रममा ठूलो परिमाणमा सुन र सुन पगाल्न प्रयोग हुने मेसिनरी उपकरण बरामद गरेको हो।

उपत्यका अपराध अनुसन्धान कार्यालयका प्रहरी नायब महानिरीक्षक (डीआईजी) गोबिन्द थपलियाले बूढानीलकण्ठबाट सुन बरामद भएको पुष्टि गरेका छन्। उनका अनुसार बरामद सुनको प्रारम्भिक अनुमान करिब २० किलो रहेको छ। यद्यपि, सुनको यकिन तौल भने जोखिएपछि मात्र पुष्टि हुनेछ।

डीआईजी थपलियाले नागरिक न्युजसँग कुरा गर्दै बूढानीलकण्ठ क्षेत्रमा अपरेसन सञ्चालन गरेर सुन बरामद गरिएको र अहिले यसको विस्तृत विवरण संकलन तथा तौल गर्ने काम भइरहेको बताएका छन्।

प्रहरीका अनुसार पक्राउ परेका दुई चिनियाँ नागरिकले बूढानीलकण्ठ क्षेत्रमा घर भाडामा लिएर सुन प्रशोधन गर्ने अवैध गतिविधि सञ्चालन गर्दै आएका थिए। उनीहरूले विदेशबाट तरल अवस्थामा अवैध सुन नेपाल भित्र्याउने र भाडामा लिएको घरभित्रै मेसिनको प्रयोग गरी सुन पगालेर चक्का अर्थात् बिस्कुटको आकारमा तयार पार्ने गरेको प्रारम्भिक अनुसन्धानबाट खुलेको छ।

प्रहरी टोलीले छापा मार्ने क्रममा सुन पगाल्न प्रयोग हुने मेसिनसहित अन्य आवश्यक उपकरणसमेत बरामद गरेको जनाएको छ। यसबाट उनीहरूले घरभित्रै सुन प्रशोधन गरी विभिन्न ठाउँमा आपूर्ति गर्ने गरेको हुनसक्ने प्रहरीको प्रारम्भिक निष्कर्ष छ।

पक्राउ परेका दुवै चिनियाँ नागरिकलाई प्रहरीले नियन्त्रणमा लिएर थप अनुसन्धान अघि बढाएको छ। उनीहरू नेपालमा कहिलेदेखि यस्तो गतिविधिमा संलग्न थिए, अवैध सुन कहाँबाट ल्याइएको थियो र यसमा अन्य व्यक्ति तथा समूहको संलग्नता छ कि छैन भन्ने विषयमा अनुसन्धान भइरहेको प्रहरीले जनाएको छ।

बरामद भएको सुनको यकिन परिमाण, यसको बजार मूल्य तथा घटनामा संलग्न अन्य व्यक्तिबारे अनुसन्धान पूरा भएपछि थप विवरण सार्वजनिक गरिने प्रहरीले जनाएको छ।