कन्टेनरभित्र लुकाएर लगिँदै थियो ७ हजार १५२ पिस सर्ट, प्रहरीले समात्यो

कपिलवस्तु । कपिलवस्तुको शिवराज नगरपालिका–१, शिवपुर कोलनी चोकबाट प्रहरीले बिलबिजक नभएको ठूलो परिमाणको रेडिमेड सर्ट बरामद गरेको छ।

सोमबार बिहान करिब १०ः३० बजे पूर्व–पश्चिम राजमार्गमा चेकजाँच गर्ने क्रममा काठमाडौंँबाट दाङतर्फ जाँदै गरेको बा.प्र.०१–००७ ख ६४३० नम्बरको कन्टेनरबाट प्रहरीले ७ हजार १५२ पिस रेडिमेड सर्ट बरामद गरेको हो।

इलाका प्रहरी कार्यालय सुन्दरीडाँडाबाट खटिएको ७ जनाको प्रहरी टोलीले चेकजाँचका क्रममा बिलबिजक नभएको अवस्थामा उक्त सर्ट फेला पारेको प्रहरीले जनाएको छ।

प्रहरीका अनुसार बरामद सर्टको अनुमानित मूल्य ५२ लाख ५३ हजार १४४ रुपैयाँ रहेको छ। यस्तै, सर्ट ओसारपसारमा प्रयोग भएको कन्टेनरको अनुमानित मूल्य ३० लाख रुपैयाँ रहेको प्रहरीले जनाएको छ।

बरामद सर्ट तथा कन्टेनरलाई नियन्त्रणमा लिएर आवश्यक कानुनी कारबाहीका लागि इलाका प्रहरी कार्यालय सुन्दरीडाँडामा राखिएको छ।

घटनाबारे थप अनुसन्धान भइरहेको प्रहरीले जनाएको छ।