पर्सामा पेस्तोल, ६ राउण्ड गोली र छुरासहित दुई भारतीय नागरिक पक्राउ

बिरगंज, पर्सा, १६ कार्तिक 

पर्सा प्रहरीले अवैध हतियार तथा धारिलोहतियारसहित दुई भारतीय नागरिकलाई पक्राउ गरेको छ। सशस्त्र प्रहरी बलको टोलीले पर्साको विन्दवासिनी गाउँपालिका–५, प्रसौनीभाठाबाट उनीहरूलाई नियन्त्रणमा लिएको हो।

सशस्त्र प्रहरी बल, नेपाल बीओपी प्रसौनीभाठाबाट खटिएको टोलीले सोमबार नियमित चेकजाँच गर्ने क्रममा भारतीय नम्बर प्लेटको मोटरसाइकलमा सवार दुई जनालाई रोकेर जाँच गरेको थियो।

जाँचका क्रममा उनीहरूले बोकेको झोलाभित्र कपडामा लुकाएर राखिएको अवस्थामा एक थान डोमी पेस्तोल, ६ राउण्ड डोमी गोली र तीन थान छुरा फेला परेको सशस्त्र प्रहरीले जनाएको छ।

त्यस्तै, उनीहरूको साथबाट नेपाली रुपैयाँ ९ हजार ४००, भारतीय रुपैयाँ २२ हजार ४०, दुई थान भिभो मोबाइल र विभिन्न प्रकारका औषधिसमेत बरामद गरिएको छ।

पक्राउ परेका दुवै जनालाई बरामद सामग्रीसहित आवश्यक कानुनी कारबाहीका लागि सम्बन्धित निकायमा बुझाउने प्रक्रिया अगाडि बढाइएको सशस्त्र प्रहरीले जनाएको छ।