पोखरामा स्कुल बस दुर्घटना : चार विद्यार्थी र एक वृद्धको मृत्यु, १४ जना घाइते

बिरगंज, पर्सा, २३ असोज 

पोखरा, २३ असोज। कास्कीको पोखरा महानगरपालिका–२८ कालिकास्थित ओख्लेको भिरमा स्कुल बस दुर्घटना हुँदा चार जना विद्यार्थी र एक वृद्धसहित पाँच जनाको मृत्यु भएको छ। दुर्घटनामा १४ जना घाइते भएका छन्।

कालिका इङ्ग्लिस बोर्डिङ स्कुलको ग २ ख १४१७ नम्बरको बस सडकबाट करिब २०० मिटर तल खसेर दुर्घटनाग्रस्त भएको हो। दुर्घटनापछि बसमा सवार १९ जनाकै उद्धार गरी उपचारका लागि विभिन्न अस्पतालमा पठाइएको थियो। उपचारका क्रममा पाँच जनाको मृत्यु भएको प्रहरीले जनाएको छ।

मृत्यु हुनेमा चार विद्यार्थी र एक वृद्ध

प्रहरीका अनुसार दुर्घटनामा मृत्यु हुनेमा करिब १२–१३ वर्षीया ममता तिवारी, १३–१४ वर्षीय अशिम कँडेल, नामथर खुल्न नसकेका दुई जना १३–१४ वर्षीया बालिका र पोखरा महानगरपालिका–२८ निवासी ६५ वर्षीय बाबुराम तिवारी रहेका छन्।

बाबुराम तिवारी स्कुल बसमा लिफ्ट मागेर सवार भएका व्यक्ति रहेको बताइएको छ। दुर्घटनामा गम्भीर घाइते भएका उनीहरूलाई उपचारका लागि अस्पताल लगिएको थियो। तर, उपचारकै क्रममा बिहान ८ः३५ बजेदेखि ९ बजेसम्म विभिन्न समयमा चिकित्सकले पाँचै जनालाई मृत घोषणा गरेका थिए।

१४ जना घाइते, एक जनाको अवस्था गम्भीर

दुर्घटनामा घाइते भएका १४ जनाको पोखराका दुई अस्पतालमा उपचार भइरहेको छ। घाइतेमध्ये तीन जनाको गण्डकी मेडिकल कलेज (जीएमसी) र ११ जनाको पोखरा स्वास्थ्य विज्ञान प्रतिष्ठानअन्तर्गत गण्डकी अस्पतालमा उपचार भइरहेको प्रहरीले जनाएको छ।

जीएमसीमा उपचाररत घाइतेहरूमा पोखरा–२८ सौर्यकी १६ वर्षीया सृष्टि तिवारी, १६ वर्षीय शिसन थापा मगर र पोखरा–२८ डाँडागाउँका १६ वर्षीय सौगात तिमिल्सिना रहेका छन्। उनीहरू कक्षा १० मा अध्ययनरत रहेको र तीनै जनाको अवस्था मध्यम रहेको जनाइएको छ।

त्यस्तै, गण्डकी अस्पतालमा उपचाररत १५ वर्षीया अस्मी कँडेलको अवस्था गम्भीर रहेको छ। अन्य घाइतेहरूमा स्नेहा गौतम, सोनिया तिवारी, अंकित पराजुली, स्मृती खत्री, स्नेहा तिवारी, आकृती बुढाथोकी, मेरिना तिवारी, सुप्रिया आचार्य, यमन मगर र बस चालक ५७ वर्षीय तुलबहादुर गुरुङ रहेका छन्।

घाइतेमध्ये अधिकांशको टाउकोलगायत शरीरका विभिन्न भागमा चोट लागेको बताइएको छ। उनीहरूको अस्पतालमा उपचार भइरहेको छ।

उद्धारमा खटिएका प्रहरी जवान पनि घाइते

दुर्घटनामा परेकाहरूको उद्धार गर्ने क्रममा इलाका प्रहरी कार्यालय शिशुवामा कार्यरत प्रहरी जवान अर्जुन शाहीसमेत सामान्य घाइते भएका छन्। उनको पश्चिम क्षेत्रीय गण्डकी अस्पतालमा उपचार भइरहेको जनाइएको छ।

दुर्घटनाको कारणबारे अनुसन्धान

सडकबाट करिब २०० मिटर तल बस खस्दा ठूलो मानवीय क्षति भएको यस दुर्घटनाको कारणबारे प्रहरीले अनुसन्धान अघि बढाएको छ।

बस कसरी दुर्घटनामा पर्‍यो भन्ने विषयमा अनुसन्धान भइरहेको प्रहरीले जनाएको छ। दुर्घटनाको यकिन कारण भने खुल्न बाँकी रहेको छ।