सप्तरीमा दलित महिलामाथि सामूहिक बलात्कारको आरोप, तीन युवकको खोजीमा प्रहरी

बिरगंज, पर्सा, ८  कार्तिक 

बुधवार कार्तिक ६ गते सप्तरीको सुरुङ्गा नगरपालिका–९, टिकुलियामा दुर्गा पूजाको मूर्ति विसर्जन गरेर घर फर्किँदै गरेकी २५ वर्षीया दलित महिलामाथि सामूहिक बलात्कार भएको आरोप लागेको छ। घटनामा संलग्न रहेको आरोपमा तीन जना स्थानीय युवकविरुद्ध पीडित पक्षले प्रहरीमा किटानी जाहेरी दिएको छ।

पीडित परिवारका अनुसार बुधबार राति करिब साढे ९ बजे स्थानीय मदरसानजिकै रहेको आँपको बगैँचामा घटना भएको हो।

गाउँमा आयोजित दुर्गा पूजाको मूर्ति विसर्जनका लागि बलान नदी लगिएको थियो। मूर्ति विसर्जनपछि ट्याक्टरमा फर्किने क्रममा डिजेल सकिएर गाडी बाटोमै रोकिएपछि ती महिला एक्लै पैदल घरतर्फ जाँदै थिइन्। सोही क्रममा बाटो छेउमा रहेका तीन जना युवकले उनलाई नियन्त्रणमा लिई मुख थुनेर नजिकैको आँपको बगैँचामा लगेको र पालैपालो जबरजस्ती करणी गरेको पीडितले दिएको जाहेरीमा उल्लेख छ।

जाहेरीअनुसार आरोपितहरूले धाकधम्की दिँदै जबरजस्ती करणी गरेपछि पीडितलाई घटनास्थलमै बेहोस अवस्थामा छाडेर फरार भएका थिए। अबेरसम्म घर नफर्किएपछि खोजीमा निस्किएका स्थानीयवासी तथा आफन्तले उनलाई घटनास्थलबाट उद्धार गरेको पीडितले बताएकी छन्।

घटनापछि केही स्थानीय नेताले पीडित परिवारलाई विभिन्न प्रलोभन देखाएर घटना सामसुम पार्न खोजेको स्रोतको दाबी छ। यद्यपि, पीडित पक्षले बिहीबार साँझ करिब ५ बजे इलाका प्रहरी कार्यालय कडरबोनामा जाहेरी दिएको जनाएको छ।

जिल्ला प्रहरी कार्यालय सप्तरीका अनुसार घटनाको संवेदनशीलतालाई ध्यानमा राख्दै पीडितको स्वास्थ्य परीक्षण तथा घटनास्थल मुचुल्कालगायतका अनुसन्धान प्रक्रिया अगाडि बढाइएको छ।

सप्तरीका प्रहरी प्रमुख प्रहरी उपरीक्षक रूपक खड्काका अनुसार घटनामा संलग्न रहेको आशङ्का गरिएका युवकहरूको पहिचान भइसकेको छ। उनीहरूको खोजी कार्य तीव्र पारिएको प्रहरीले जनाएको छ।

अनुसन्धान प्रभावित नहोस् र आरोपितहरू फरार हुन नपाऊन् भन्ने उद्देश्यले प्रहरीले थप विवरण गोप्य राखेर अनुसन्धान अघि बढाएको जनाएको छ।

नोट: घटनाबारे अनुसन्धान जारी रहेकाले आरोपितहरू दोषी ठहर भइसकेका छैनन्। उनीहरूको दोष अदालतबाट प्रमाणित हुन बाँकी छ।