सिन्धुलीमा जीप सुनकोसी नदीमा खस्दा तीन जनाको मृत्यु, तीन बेपत्ता

बिरगंज, पर्सा, १ कार्तिक 

सिन्धुली। मध्यपहाडी लोकमार्गअन्तर्गत सिन्धुलीको फिक्कल गाउँपालिका–६, नागथानमा यात्रुवाहक जीप सुनकोसी नदीमा खस्दा तीन जनाको मृत्यु भएको छ भने चार जना घाइते भएका छन्। दुर्घटनामा परी अन्य तीन जना बेपत्ता भएका छन्।

प्रहरीका अनुसार आइतबार बिहान करिब २:३० बजे काठमाडौंबाट खोटाङतर्फ जाँदै गरेको को १ ज २९७६ नम्बरको जीप अनियन्त्रित भई सडकबाट करिब २०० मिटर तल सुनकोसी नदीमा खसेको हो।

दुर्घटनाको खबर प्राप्त हुनासाथ प्रहरी चौकी रत्नावती र प्रहरी चौकी खाङसाङबाट खटिएको प्रहरी टोलीले उद्धार कार्य सुरु गरेको थियो। दुर्घटनास्थलबाट तीन जना महिलाको शव फेला परेको प्रहरीले जनाएको छ।

दुर्घटनामा घाइते भएका चालकसहित चार जनालाई तत्काल उद्धार गरी उदयपुरको घुर्मीस्थित जनसेवा हेल्थ सेन्टर प्रा.लि. पुर्‍याइएको थियो। त्यहाँ प्राथमिक उपचारपछि थप उपचारका लागि उनीहरूलाई सिन्धुली जिल्ला अस्पताल रिफर गरिएको छ।

नदीमा बेपत्ता भएका तीन जनाको खोजी कार्य जारी रहेको प्रहरीले जनाएको छ। दुर्घटनाको थप विवरण आउन बाँकी छ।