विराटनगरमा दुई युवतीलाई बन्धक बनाएर जबर्जस्ती यौनधन्दामा लगाएको आरोप, एक जनाविरुद्ध मुद्दा दायर

बिरगंज, पर्सा, १८ कार्तिक 

विराटनगर । रोजगारीको प्रलोभन देखाएर दुई युवतीलाई बन्धक बनाई जबर्जस्ती यौनधन्दामा लगाएको आरोपमा मोरङ जिल्ला अदालतमा मानव बेचबिखन तथा ओसारपसारसम्बन्धी मुद्दा दायर भएको छ ।

जिल्ला सरकारी वकिल कार्यालय मोरङले घटनामा संलग्न रहेको आरोप लागेका परवेज महमदविरुद्ध मुद्दा दायर गरेको हो । घटनामा संलग्न अर्का आरोपित रामविलास महतो भने फरार रहेको जनाइएको छ ।

अभियोगपत्रअनुसार बेरोजगार रहेका दुई युवतीलाई होटलमा राम्रो कमाइ हुने काम दिलाइदिने प्रलोभन देखाएर विराटनगर ल्याइएको थियो । त्यसपछि उनीहरूलाई विराटनगर महानगरपालिका–१३ स्थित मलाया रोड नजिकैको एक सुनसान घरमा लगेर बन्धक बनाइएको आरोप छ ।

आरोपितहरूले होटल सञ्चालन गर्ने बहानामा घर भाडामा लिएको र त्यहाँका कोठाहरूमा युवतीहरूलाई राखेर बाहिरबाट आउने पुरुषसँग जबर्जस्ती यौनसम्पर्क गर्न बाध्य बनाउने गरेको अभियोगपत्रमा उल्लेख छ ।

युवतीहरूले अस्वीकार गर्दा मानसिक तथा शारीरिक दबाब दिने र डरत्रास देखाएर जबर्जस्ती गर्ने गरिएको आरोप छ । उनीहरूसँग यौनसम्पर्क गरेबापत पुरुषहरूबाट रकम असुल्ने तर युवतीहरूलाई भने कुनै पैसा नदिने गरेको अभियोगपत्रमा जनाइएको छ ।

पीडित युवतीहरूले असह्य भएपछि जिल्ला प्रहरी कार्यालय मोरङमा उजुरी दिएका थिए । त्यसपछि प्रहरीले घटनास्थलमा पुगेर दुवै युवतीलाई उद्धार गरेको थियो । प्रहरीका अनुसार घटनास्थलबाट एक आरोपित परवेज महमदलाई पक्राउ गरिएको थियो भने अर्का आरोपित रामविलास महतो फरार भएका थिए ।

अनुसन्धानका क्रममा पक्राउ परेका आरोपितले प्रहरीसमक्ष घटनामा आफ्नो संलग्नता स्वीकार गरेको विवरणसमेत अभियोगपत्रमा उल्लेख गरिएको छ ।

जिल्ला सरकारी वकिल कार्यालयका सहायक जिल्ला न्यायाधिवक्ता वसन्त काफ्लेले अदालतमा दायर गरेको अभियोगपत्रमा मानव बेचबिखन तथा ओसारपसार (नियन्त्रण) ऐन, २०६४ अनुसार कारबाहीको माग गरिएको छ ।

सरकारी पक्षले आरोपितहरूलाई १० देखि १५ वर्षसम्म कैद र ५० हजारदेखि एक लाख रुपैयाँसम्म जरिवाना गर्न माग गरेको छ । साथै पीडित युवतीहरूलाई उचित क्षतिपूर्ति उपलब्ध गराउन र फरार आरोपित रामविलास महतोविरुद्ध पक्राउ पुर्जी जारी गर्न पनि माग गरिएको छ ।

घटनासम्बन्धी केही प्रमाण परीक्षणका लागि राष्ट्रिय विधि विज्ञान प्रयोगशाला, सामाखुसी काठमाडौं पठाइएको जनाइएको छ ।