पोखरामा मादक पदार्थ सेवन गरी स्कुल बस चलाउने ५ चालक पक्राउ

पोखरा — मादक पदार्थ सेवन गरी विद्यालय बस चलाइरहेका पाँच जना चालकलाई प्रहरीले नियन्त्रणमा लिएको छ। विद्यार्थीको सुरक्षामाथि गम्भीर लापरबाही गरेको आरोपमा उनीहरूलाई कारबाहीका लागि प्रक्रिया अगाडि बढाइएको प्रहरीले जनाएको छ।

जिल्ला प्रहरी कार्यालय कास्कीका प्रहरी नायब उपरीक्षक हरिबहादुर बस्नेतका अनुसार नियमित सवारी जाँचका क्रममा विभिन्न स्थानबाट ती चालकहरूलाई नियन्त्रणमा लिइएको हो। जाँचका क्रममा मादक पदार्थ सेवन गरेको पुष्टि भएपछि उनीहरूलाई पक्राउ गरिएको प्रहरीले जनाएको छ।

पक्राउ पर्नेमा माउण्ट हेवन बोर्डिङ स्कुलको ग१क ३६७४ नम्बर बसका चालक ३३ वर्षीय आनन्द परियार र कुमुदिनी होम्स बोर्डिङ स्कुलको ग१क १३८२ नम्बर बसका चालक ३७ वर्षीय गौतम गुरुङ रहेका छन्।

त्यसैगरी, बिन्देश्वरी बोर्डिङ स्कुलको ग१क ६२२१ नम्बर बसका चालक ४४ वर्षीय भक्तबहादुर गुरुङ, अञ्जली बोर्डिङ स्कुलको ग१क ६४३ नम्बर बसका चालक ४८ वर्षीय डम्बरबहादुर गुरुङ तथा एसओएस बोर्डिङ स्कुलको ग१क ६४३३ नम्बर बसका चालक ४७ वर्षीय पदम विकलाई पनि मादक पदार्थ सेवन गरी सवारी चलाइरहेको अवस्थामा नियन्त्रणमा लिइएको हो।

प्रहरीका अनुसार विद्यार्थी बोकेको वा विद्यार्थी लिन जाने क्रममा रहेका सवारी साधनका चालकले मादक पदार्थ सेवन गर्नु गम्भीर कानुनी अपराध हो। पक्राउ परेका सबै चालकविरुद्ध सवारी तथा यातायात सम्बन्धी कानुन अनुसार कारबाही प्रक्रिया अघि बढाइएको प्रनाउ बस्नेतले जानकारी दिए।

प्रहरीले विद्यालय बस चालकहरूलाई जिम्मेवार र सजग भएर सवारी सञ्चालन गर्न तथा अभिभावकहरूलाई पनि बालबालिकाको सुरक्षाबारे सचेत रहन आग्रह गरेको छ। आगामी दिनमा पनि विद्यालय बसलगायत सार्वजनिक सवारी साधनमाथि विशेष निगरानी र चेकजाँचलाई कडाइका साथ निरन्तरता दिइने जनाएको छ।