त्रिवि ऐन संशोधनको विरोधमा विद्यार्थी प्रदर्शन, शिक्षामन्त्री पोखरेललाई कालो ब्यानर

बिरगंज, पर्सा २२ असोज 

काठमाडौं । त्रिभुवन विश्वविद्यालय (त्रिवि) को ६७औँ सभा बैठकमा सहभागी हुन कीर्तिपुरस्थित विश्वविद्यालय परिसर पुगेका शिक्षा तथा खेलकुदमन्त्री एवं त्रिविका सहकुलपति सस्मित पोखरेलविरुद्ध विद्यार्थीहरूले प्रदर्शन गरेका छन्।

बिहीबार आयोजित सभा बैठकमा सहभागी हुन पुगेका मन्त्री पोखरेललाई विभिन्न राजनीतिक दलनिकट विद्यार्थीहरूले कालो ब्यानर देखाउँदै विरोध जनाएका हुन्। विद्यार्थीहरूले त्रिवि ऐन परिमार्जन गर्न लागिएको भन्दै त्यसअघि विद्यार्थीहरूसँग आवश्यक छलफल र संवाद नगरिएकोमा असन्तुष्टि जनाएका छन्।

विद्यार्थीहरूले ऐन संशोधनको प्रक्रिया अघि बढाउनुअघि विद्यार्थी प्रतिनिधिसँग छलफल गर्नुपर्ने माग राखेका छन्। प्रदर्शनका क्रममा उनीहरूले ‘नेपोबेबी मुर्दावाद’, ‘मुर्दावाद, मुर्दावाद’ तथा ‘राजनीतिक भागबण्डा बन्द गर’ लगायतका नारा लगाएका थिए।

विद्यार्थी तथा युवाहरूले त्रिविमा हुने राजनीतिक भागबण्डाको विरोध गर्दै मन्त्री पोखरेलविरुद्ध नाराबाजी गरेको जनाइएको छ।

यसैबीच त्रिभुवन विश्वविद्यालयको ६७औँ सभा बैठक सुरु भएको छ। यसपटक कुलपति एवं प्रधानमन्त्री बैठकमा अनुपस्थित भएपछि सहकुलपति पोखरेलले सभाको अध्यक्षता गरेका छन्।

बैठकमा आर्थिक वर्ष २०८३/८४ को नीति, कार्यक्रम तथा बजेट प्रस्तुत गरी छलफल र अनुमोदन गर्ने कार्यसूची रहेको छ। त्यस्तै, विश्वविद्यालयको कार्यकारी परिषद्का लागि मनोनयन तथा पुनरावेदन समितिका अध्यक्ष र सदस्य मनोनयनसम्बन्धी प्रस्तावमा समेत छलफल हुने बताइएको छ।

सभालाई सम्बोधन गर्दै मन्त्री पोखरेलले त्रिभुवन विश्वविद्यालयका सबै संकायको परीक्षा नतिजा परीक्षा सम्पन्न भएको एक महिनाभित्र सार्वजनिक गर्नुपर्ने बताएका छन्। उनले समयमा परीक्षा सञ्चालन र नतिजा प्रकाशनमा देखिएको समस्या समाधान गर्न विकेन्द्रीकरणको नीति लागू गर्नुपर्नेमा समेत जोड दिएका छन्।

मन्त्री पोखरेलले विश्वविद्यालयमा शैक्षिक क्यालेन्डरको प्रभावकारी कार्यान्वयन, सुशासन, प्रविधिको प्रयोग तथा अनुसन्धानमुखी वातावरण निर्माणमा जोड दिएका छन्।