‘महाकाव्य श्री रामायण कथा’ फ्लप भएपछि रणबीरको ‘रामायण’ टिममाथि निर्माताको गम्भीर आरोप

भारतीय कन्टेन्ट क्रियटर अञ्जली अरोडाको अभिनय रहेको फिल्म ‘महाकाव्य श्री रामायण कथा’ बक्स अफिसमा अपेक्षित सफलता हासिल गर्न नसकेपछि फिल्मका निर्माता प्रकाश महोबियाले चर्चामा रहेको ‘रामायण’ फिल्मको टिममाथि गम्भीर आरोप लगाएका छन्।

नितेश तिवारीको निर्देशनमा रणबीर कपूर र यश अभिनीत ‘रामायण’ यसै दीपावलीमा सिनेमाघरमा रिलिज हुने तयारीमा छ। ठूलो बजेट र चर्चित कलाकारका कारण बहुप्रतीक्षित मानिएको उक्त फिल्म रिलिज हुनुअघि नै पौराणिक कथामा आधारित अर्को फिल्म ‘महाकाव्य श्री रामायण कथा’ गत २५ सेप्टेम्बरमा भारतका सिनेमाघरमा प्रदर्शनमा आएको थियो।

तर रिलिजअघि नै कलाकार छनोट र फिल्मको भीएफएक्सलाई लिएर आलोचना खेपेको ‘महाकाव्य श्री रामायण कथा’ ले बक्स अफिसमा खासै प्रभाव पार्न सकेन। फिल्म असफल भएपछि निर्माता प्रकाश महोबियाले यसको कारणबारे बोल्दै रणबीर कपूर अभिनीत ‘रामायण’को टिमले आफ्नो फिल्मविरुद्ध नकारात्मक मार्केटिङ गरेको आरोप लगाएका हुन्।

भारतको इन्डिया टुडेसँगको कुराकानीमा महोबियाले फिल्मलाई सुरुदेखि नै नकारात्मक प्रचारको सामना गर्नुपरेको दाबी गरे। उनका अनुसार युट्युबर र इन्फ्लुएन्सरहरूमार्फत फिल्मबारे नकारात्मक धारणा फैलाइएको थियो।

महोबियाले भनेका छन्, “सुरुदेखि नै नकारात्मक मार्केटिङ गरिएको थियो। हामीले आफ्ना दर्शकसम्म पुग्ने मौका नै पाएनौँ। जसले हाम्रो फिल्म हेरे, उनीहरूलाई फिल्म निकै मन परेको थियो। तर यदि उनीहरूले फिल्म हेर्न नै पाएनन् भने आफ्नो धारणा कसरी बनाउँछन्?”

उनले ठूला बजेटका अन्य फिल्महरू पनि यही विषयमा आउन लागेकाले आफ्नो फिल्मविरुद्ध नकारात्मक प्रचारका लागि युट्युबर तथा इन्फ्लुएन्सरहरूलाई अवसर दिइएको दाबी गरे।

उनका अनुसार, “हामीलाई प्राप्त जानकारीअनुसार युट्युबर, इन्फ्लुएन्सर र अन्य व्यक्तिहरूलाई नकारात्मक मार्केटिङका धेरै अवसर दिइएका थिए। उनीहरूले गलत जानकारी फैलाइरहेका थिए र मानिसहरूलाई हाम्रो फिल्म नहेर्न भनिरहेका थिए।”

यद्यपि, निर्माता महोबियाले लगाएको यो आरोपबारे ‘रामायण’को टिमको आधिकारिक प्रतिक्रिया सार्वजनिक भएको छैन।

अञ्जली अरोडाको सीता भूमिकालाई लिएर विवाद

‘महाकाव्य श्री रामायण कथा’ अभिषेक सिंहको निर्देशनमा बनेको फिल्म हो। फिल्ममा अञ्जली अरोडासँगै देव शर्मा र रजनीश दुग्गललगायत कलाकारको अभिनय छ।

फिल्म प्रदर्शनमा आउनुअघि नै सीताको भूमिकामा अञ्जली अरोडालाई छनोट गरिएको विषयमा सामाजिक सञ्जालमा विरोध र आलोचना भएको थियो। त्यस्तै, फिल्मको भीएफएक्सलाई लिएर पनि दर्शक तथा सामाजिक सञ्जाल प्रयोगकर्ताबाट विभिन्न प्रतिक्रिया आएका थिए।

अर्कोतर्फ, नितेश तिवारी निर्देशित रणबीर कपूर र यश अभिनीत ‘रामायण’ ठूलो बजेट, स्टारकास्ट र अन्तर्राष्ट्रिय स्तरको निर्माणका कारण भारतीय फिल्म उद्योगकै बहुप्रतीक्षित प्रोजेक्टमध्ये एक बनेको छ। फिल्मको प्रदर्शन मिति नजिकिँदै जाँदा यसलाई लिएर दर्शकमाझ उत्सुकता पनि बढिरहेको छ।