४१५ रुपैयाँको तोरीको तेल किन्दा गौरीशंकरले जिते १० लाख रुपैयाँ!

बिरगंज, पर्सा,१६ कात्तिक

सामान्य किनमेल गर्दा पनि भाग्य चम्किन सक्छ भन्ने उदाहरण बनेका छन् धनुषाका एक युवक। मात्र ४१५ रुपैयाँको सामान खरिद गरेका उनले १० लाख रुपैयाँ नगद पुरस्कार जितेका छन्।

धनुषाको नगराइन नगरपालिका–९ घोरघास स्थायी घर भई हाल ललितपुरमा बस्दै आएका गौरीशंकर पण्डितले सरकारको करदाता प्रोत्साहन कार्यक्रमअन्तर्गत १० लाख रुपैयाँको प्रथम पुरस्कार जितेका हुन्।

पण्डितले गत कात्तिक ५ गते ललितपुरको धापाखेलस्थित बिगमार्टबाट ४१५ रुपैयाँ बराबरको तोरीको तेल खरिद गरेका थिए। उक्त सामानको भुक्तानी उनले डिजिटल माध्यम ई–सेवाबाट गरेका थिए।

आन्तरिक राजस्व विभागले सोमबार विद्युतीय प्रणालीमार्फत बिल जारी गर्ने ग्राहकलाई लक्षित गरी सञ्चालन गरेको लक्की ड्रको नतिजा सार्वजनिक गर्दा पण्डित प्रथम पुरस्कार विजेता घोषित भएका हुन्।

सरकारले डिजिटल भुक्तानीको प्रयोग बढाउन, आधिकारिक बिलिङ प्रणालीलाई प्रोत्साहन गर्न तथा कर प्रणालीलाई पारदर्शी बनाउन यस्तो कार्यक्रम सञ्चालन गर्दै आएको छ।

सानो रकमको खरिदमा गरिएको डिजिटल भुक्तानीले १० लाख रुपैयाँको पुरस्कार दिलाएपछि पण्डितको यो सफलता चर्चाको विषय बनेको छ।