बारामा भन्सार छलीका लत्ताकपडासहित मोटरसाइकल बरामद

बिरगंज, पर्सा, १२ कार्तिक 

बाराको सीमावर्ती क्षेत्रबाट सशस्त्र प्रहरी बलले भन्सार छली गरी भारतबाट नेपालतर्फ ल्याउँदै गरिएको लत्ताकपडासहित मोटरसाइकल बरामद गरेको छ।

विश्रामपुर गाउँपालिका–१ खेखरिया क्षेत्रबाट सशस्त्र प्रहरी बल नेपाल, बीओपी बरैनियाबाट खटिएको गस्ती टोलीले बिहीबार उक्त सामान बरामद गरेको हो।

सशस्त्र प्रहरीका अनुसार बरामद गरिएका लत्ताकपडा तथा सामान ढुवानीमा प्रयोग गरिएको मोटरसाइकलको कुल अनुमानित मूल्य ६ लाख ४६ हजार ७५० रुपैयाँ रहेको छ।

सीमावर्ती क्षेत्रमा भन्सार छली गरी सामान ओसारपसार भइरहेको सूचनाका आधारमा गस्ती टोलीले निगरानी तथा गस्ती गर्ने क्रममा उक्त सामान नियन्त्रणमा लिएको जनाइएको छ।

बरामद गरिएका लत्ताकपडा र मोटरसाइकल आवश्यक कानुनी कारबाहीका लागि सम्बन्धित निकायमा बुझाउने प्रक्रिया अघि बढाइएको सशस्त्र प्रहरीले जनाएको छ।