धादिङ–चितवनका २६ राजमार्ग होटलको खाद्य स्वच्छता परीक्षण, कुनै पनि ‘ए’ र ‘बी’ श्रेणीमा परेनन्

बिरगंज, पर्सा, ३० असोज 

धादिङ । चाडपर्वको समयमा राजमार्गमा यात्रा गर्ने यात्रुलाई स्वच्छ र गुणस्तरीय खाना उपलब्ध गराउने उद्देश्यले खाद्य प्रविधि तथा गुण नियन्त्रण विभागले धादिङ र चितवन खण्डका थप २६ होटल तथा रेस्टुरेन्टको खाद्य स्वच्छता स्तरीकरण गरेको छ।

विभागको निरीक्षण टोलीले बुधबार गरेको अनुगमनका क्रममा कुनै पनि होटल ‘अति उत्तम’ (ए) वा ‘उत्तम’ (बी) श्रेणीमा पर्न सकेनन्। अनुगमन गरिएका २६ होटलमध्ये १४ वटा ‘सन्तोषजनक’ (सी) र १२ वटा ‘सामान्य’ (डी) श्रेणीमा वर्गीकृत भएका छन्।

विभागका अनुसार ‘सन्तोषजनक’ श्रेणीमा परेका १४ होटललाई एक तारासहितको हरियो स्टिकर प्रदान गरिएको छ भने ‘सामान्य’ श्रेणीमा परेका १२ होटललाई पहेँलो स्टिकर दिइएको छ।

खाद्य स्वच्छता स्तरीकरण प्रणालीअनुसार ‘अति उत्तम’ श्रेणीका होटलले तीन तारासहितको हरियो स्टिकर, ‘उत्तम’ श्रेणीले दुई तारासहितको हरियो स्टिकर, ‘सन्तोषजनक’ श्रेणीले एक तारासहितको हरियो स्टिकर र ‘सामान्य’ श्रेणीले पहेँलो स्टिकर प्राप्त गर्ने व्यवस्था छ।

सरसफाइ र खानाको गुणस्तरमा यात्रुको गुनासो

लामो दूरीका सार्वजनिक सवारीसाधन रोकिने राजमार्गका होटल तथा रेस्टुरेन्टमा सरसफाइको अभाव, बासी तथा झिँगा भन्केका खाना बिक्री हुने र मनपरी मूल्य असुल्ने गरेको जनगुनासो बढेपछि विभागले अनुगमनलाई तीव्रता दिएको हो।

विभागले यातायात व्यवस्था विभागको सूचनाको कार्यान्वयनका क्रममा धादिङको बेनीघाट रोराङ र गजुरी तथा चितवनको इच्छाकामना गाउँपालिका क्षेत्रमा सञ्चालित होटल तथा रेस्टुरेन्टको अनुगमन गरेको जनाएको छ।

चाडपर्वका बेला सार्वजनिक सवारीसाधनमा यात्रा गर्ने यात्रुको चाप बढ्ने भएकाले राजमार्गका होटलमा खाद्य स्वच्छता कायम गर्नु आवश्यक रहेको विभागको जोड छ।

मापदण्ड पालना गर्न होटल सञ्चालकलाई निर्देशन

विभागले राजमार्गमा सञ्चालित सबै होटल तथा रेस्टुरेन्टलाई तोकिएको खाद्य स्वच्छता मापदण्ड कडाइका साथ पालना गर्न सचेत गराएको छ। यात्रुको स्वास्थ्यमा खेलबाड नगर्न, सरसफाइमा ध्यान दिन र गुणस्तरीय खाना उपलब्ध गराउनसमेत होटल सञ्चालकलाई आग्रह गरिएको छ।

अनुगमनबाट प्राप्त नतिजाले राजमार्गका होटल तथा रेस्टुरेन्टमा खाद्य स्वच्छता सुधार गर्न थप निगरानी र नियमित निरीक्षण आवश्यक रहेको देखाएको छ। चाडपर्वमा यात्रा गर्ने सर्वसाधारणले पनि होटलको स्वच्छता, खानाको गुणस्तर र मूल्यमा ध्यान दिनुपर्ने देखिन्छ।