अमरेशकुमार सिंह : ‘म कहिल्यै पद र शक्तिको पछाडि लागिनँ’

काठमाडौं । राष्ट्रिय स्वतन्त्र पार्टी (रास्वपा) का सांसद अमरेशकुमार सिंहले आफूलाई कुनै पनि पदको लोभ नरहेको बताएका छन्।

कान्तिपुरसँगको अन्तर्वार्तामा सिंहले आफूले विगतमा महत्वपूर्ण सरकारी जिम्मेवारी सम्हाल्ने अवसर आए पनि सिद्धान्त र आफ्नो अडानका कारण स्वीकार नगरेको बताएका हुन्।

सिंहका अनुसार २०६३ सालमा तत्कालीन प्रधानमन्त्री गिरिजाप्रसाद कोइरालाले उनलाई गृहमन्त्री बन्न प्रस्ताव गरेका थिए। तर, मधेश आन्दोलनको समय गृह प्रशासनको जिम्मेवारी सम्हाल्दा आउन सक्ने चुनौती र परिस्थितिलाई ध्यानमा राख्दै आफूले उक्त प्रस्ताव अस्वीकार गरेको उनले बताए।

त्यस्तै, पछि सुशील कोइराला प्रधानमन्त्री रहेका बेला आफूलाई सञ्चारमन्त्री बन्न प्रस्ताव आएको भए पनि सिद्धान्त र आफ्नो अडानका कारण उक्त जिम्मेवारी स्वीकार नगरेको सिंहको भनाइ छ।

सिंहले आफू राजनीतिक जीवनमा कहिल्यै शक्ति र पदको पछाडि नलागेको दाबी गरेका छन्। उनका अनुसार पदभन्दा आफ्नो राजनीतिक धारणा, सिद्धान्त र अडानलाई प्राथमिकता दिँदै आएका छन्।

उनको यो अभिव्यक्ति पछिल्लो समय राजनीतिमा पद तथा जिम्मेवारीका विषयमा हुने बहसबीच आएको हो।