बालेन अनुपस्थित भएपछि संसदीय समितिको बैठक स्थगित

२१ वैशाख, काठमाडौं । सिंहदरबारमा सोमबार बिहान ११ बजेका लागि तय गरिएको प्रतिनिधि सभा अन्तर्गतको राज्यव्यवस्था तथा सुशासन समितिको बैठक अन्तिम समयमा आएर स्थगित भएको छ ।

प्रधानमन्त्री वालेन्द्र शाह (बालेन) को उपस्थिति अनिवार्य मानिएको यस बैठकमा उनी नआउने निश्चित भएपछि बैठक बस्दै नबसी टुङ्गिएको हो । समितिको कार्यक्षेत्रभित्र प्रधानमन्त्री तथा मन्त्रिपरिषद्को कार्यालयसहित गृह र रक्षा मन्त्रालय जस्ता महत्त्वपूर्ण निकायहरू पर्ने भए पनि सम्बन्धित मन्त्रीहरूको अनुपस्थितिले बैठक अघि बढ्न सकेन ।

समिति सचिवालयका अनुसार, संसदीय परम्परामा विभागीय मन्त्रीको उपस्थिति बिना बैठक सञ्चालन गर्ने चलन छैन ।हाल गृह र रक्षा मन्त्रालयको जिम्मेवारी स्वयं प्रधानमन्त्री शाहले नै सम्हालिरहेका छन् भने संघीय मामिला तथा सामान्य प्रशासन मन्त्री पनि अन्य पूर्वनिर्धारित कार्यक्रममा व्यस्त रहेका कारण उपस्थित हुन सकेनन् ।

विशेषगरी समितिको आगामी कार्ययोजना र कार्यक्षेत्रका विषयमा छलफल गर्ने मुख्य कार्यसूची रहे पनि ‘विशेष कारण’ जनाउँदै अर्को सूचना जारी नभएसम्मका लागि बैठक स्थगित गरिएको जानकारी सहसचिव कान्छा दुलालले दिनुभएको छ ।