हल्चोक आगलागीबारे सशस्त्र: ‘घटना होइन, दुर्घटना’

काठमाडौं । सशस्त्र प्रहरी बल (एपीएफ) ले हल्चोकस्थित मोटर ट्रान्सपोर्ट (एमटी) शाखामा गत जेठमा भएको आगलागी दुर्घटनावश भएको प्रारम्भिक निष्कर्ष सार्वजनिक गरेको छ।

बिहीबार सशस्त्र प्रहरी मुख्यालय हल्चोकमा आयोजित पत्रकार भेटघाट कार्यक्रममा प्रवक्ता तथा डीआईजी नेत्रबहादुर कार्कीले आगलागीलाई दुर्घटनाका रूपमा व्याख्या गर्दै हालसम्मको छानबिनले कुनै नियोजित घटना नभई प्राविधिक कारण देखाएको बताए।

‘त्यो घटना नभएर दुर्घटना रहेछ। विपद् अन्य व्यक्तिजस्तै हामीलाई पनि पोलेको छ,’ आगलागीबारे सोधिएको प्रश्नमा डीआईजी कार्कीले भने।

उनका अनुसार घटनाको अन्तिम प्रतिवेदन आउन बाँकी रहेकाले थप तथ्य त्यसपछि सार्वजनिक हुनेछ।

हल्चोकस्थित रंगशालाको पछाडि रहेको एमटी शाखाको अन्डरग्राउन्ड पार्किङमा २० जेठ राति आगलागी भएको थियो। घटनामा एआईजीले प्रयोग गर्ने प्राडो गाडीसहित ६ वटा एटीभी (क्वाड बाइक), स्कर्टिङ मोटरसाइकल तथा दुईवटा मोटरसाइकल जलेर नष्ट भएका थिए।

प्रारम्भिक अनुसन्धानमा विद्युतीय (इभी) एटीभी क्वाड बाइकमा सर्ट भई आगलागी भएको देखिएको स्रोतले जनाएको छ। उक्त एटीभी बाइक अमेरिकी दूतावासले सशस्त्र प्रहरीलाई सहयोगस्वरूप उपलब्ध गराएको थियो।

घटनाको विस्तृत छानबिनका लागि सशस्त्र प्रहरी मुख्यालयले डीआईजी सन्दीप थापाको नेतृत्वमा समिति गठन गरेको थियो।