हर्क साम्पाङको घोषणा : सरकार बने चालक र मजदुरको बिमा गरिने

बिरगंज, पर्सा, ७ कार्तिक 

काठमाडौं । श्रम संस्कृति पार्टीका अध्यक्ष हर्क साम्पाङले आफ्नो पार्टीको सरकार बने यातायात तथा उद्योग क्षेत्रमा कार्यरत चालक र मजदुरको हकहित सुनिश्चित गर्दै उनीहरूको बिमा गरिने घोषणा गरेका छन्।

साम्पाङले सामाजिक सञ्जालमार्फत यस्तो घोषणा गरेका हुन्। उनले श्रम संस्कृतिको सरकार गठन भएको दिनदेखि नै यातायात तथा उद्योगमा काम गर्ने चालक र मजदुरलाई न्याय प्रदान गर्ने प्रतिबद्धता व्यक्त गरेका छन्।

उनले सामाजिक सञ्जालमा लेखेका छन्, “श्रम संस्कृतिको सरकार आएको दिन यातायात तथा उद्योगमा काम गर्ने तमाम चालक र मजदुरहरूलाई न्याय दिइनेछ। बिमा गरिनेछ।”

उनको घोषणाले यातायात तथा उद्योग क्षेत्रमा कार्यरत चालक र मजदुरको अधिकार, सुरक्षा र सामाजिक संरक्षणको विषयलाई प्राथमिकतामा राखेको देखिन्छ।

यद्यपि, बिमा कार्यक्रमको स्वरूप, कार्यान्वयन प्रक्रिया तथा त्यसका लागि आवश्यक स्रोत व्यवस्थापनबारे भने उनले विस्तृत विवरण सार्वजनिक गरेका छैनन्।