हेलिकप्टर उद्धारमा १५ अर्ब खर्च भएको दाबी गलत : गृहमन्त्री गुरुङ, वास्तविक खर्च १४–२० करोड

काठमाडौं । गृहमन्त्री सुधन गुरुङले विपद्का बेला हेलिकप्टरमार्फत गरिएको उद्धारमा १५ अर्ब रुपैयाँ खर्च भएको विवरण गलत रहेको बताएका छन्।

गुरुङका अनुसार हेलिकप्टर उद्धारमा सरकारको वास्तविक खर्च १४ देखि २० करोड रुपैयाँको हाराहारीमा रहेको छ। उद्धारमा भएको खर्चबारे सार्वजनिक रूपमा आएको १५ अर्ब रुपैयाँको विवरण तथ्यपरक नभएको उनको भनाइ छ।

गृहमन्त्री गुरुङले रसुवाका बाढी प्रभावित परिवारलाई ६ महिनासम्म मासिक १५ हजार रुपैयाँका दरले घरभाडा उपलब्ध गराउने व्यवस्था गरिएको जानकारी पनि दिएका छन्। उनका अनुसार ठूलो परिवारका लागि थप २ हजार रुपैयाँ उपलब्ध गराइनेछ।

विपद्बाट घरबारविहीन भएका प्रभावित परिवारका लागि सरकारले दुई कोठे अस्थायी आवास निर्माण गर्ने योजना अघि बढाएको उनले बताए। तत्कालीन व्यवस्थापनसँगै दीर्घकालीन रूपमा व्यवस्थित टाउनसिप निर्माण गरी प्रभावितलाई पुनर्वास गर्ने सरकारको योजना रहेको गुरुङको भनाइ छ।

यसैबीच, विपद् आउनुअघि गरिने पूर्वतयारीमा भएका कमजोरीको समीक्षा गर्न सरकारले छुट्टै समिति गठन गर्ने निर्णय गरेको पनि गृहमन्त्री गुरुङले जानकारी दिए।

उनका अनुसार आगामी दिनमा विपद् पूर्वतयारी, उद्धार तथा राहत व्यवस्थापनलाई थप प्रभावकारी बनाउने उद्देश्यले विगतका कमजोरीको अध्ययन गरी आवश्यक सुधारका उपाय अघि बढाइनेछ।