जलवायु संकटको विषय अन्तर्राष्ट्रिय मञ्चमा उठाएको भन्दै प्रधानमन्त्री शाहलाई खुस्बु ओलीको धन्यवाद

काठमाडौं । राष्ट्रिय प्रजातन्त्र पार्टी (राप्रपा)की सांसद खुस्बु ओलीले प्रधानमन्त्री बालेन्द्र शाहले संयुक्त राष्ट्रसंघको ८१औँ महासभामा नेपालले भोगिरहेको जलवायु संकट र जलवायु न्यायको विषय उठाएको भन्दै धन्यवाद व्यक्त गरेकी छन्।

सांसद ओलीले जलवायु परिवर्तनका कारण नेपालले भोगिरहेको क्षति, प्रभावित समुदायको अवस्था तथा जलवायु न्यायको आवश्यकतालाई अन्तर्राष्ट्रिय मञ्चमा प्रस्तुत गरिएको विषयलाई सकारात्मक रूपमा लिएको बताएकी छन्।

प्रधानमन्त्री शाहले महासभालाई सम्बोधन गर्दै नेपालले विश्वको कुल हरितगृह ग्यास उत्सर्जनमा ०.१ प्रतिशतभन्दा कम योगदान गरे पनि जलवायु संकटको ठूलो असर भोगिरहेको बताएका थिए। नेपालमा जलवायु परिवर्तनका कारण हिमाली तथा अन्य संवेदनशील क्षेत्रमा परेको प्रभावलाई अन्तर्राष्ट्रिय समुदायसमक्ष ध्यानाकर्षण गराउँदै उनले जलवायु न्यायको आवश्यकता औँल्याएका थिए।

शाहले नेपाल, भारत र चीनको नेतृत्वमा ‘हिमालयन क्लाइमेट रेजिलियन्स मेकानिज्म’ स्थापना गर्न प्रस्तावसमेत गरेका थिए। उक्त संयन्त्रमार्फत हिमाली क्षेत्रमा सूचना आदानप्रदान, जलवायु जोखिमको निगरानी तथा पूर्वसूचना प्रणालीलाई थप प्रभावकारी बनाउन सकिने उनको प्रस्ताव थियो।

यसैबीच, प्रधानमन्त्री शाहले आफ्नो सम्बोधनको अन्त्यमा नेपालको धार्मिक तथा सांस्कृतिक पहिचानसँग जोडिएको सन्देशसमेत दिएका थिए। उनले ‘भगवान् पशुपतिनाथले विश्वको कल्याण गरून्’ र ‘यो विश्व बुद्धले देखाएको बाटोमा हिँड्न सकोस्’ भन्ने सन्देश व्यक्त गरेका थिए।

सांसद ओलीले प्रधानमन्त्री शाहको उक्त धार्मिक तथा सांस्कृतिक सन्देशको समेत प्रशंसा गरेकी छन्। उनका अनुसार नेपालका मौलिक धार्मिक, सांस्कृतिक र मानवीय मूल्यलाई अन्तर्राष्ट्रिय मञ्चमा प्रस्तुत गर्नु सकारात्मक पक्ष हो।