जीपीएसले देखाएको लोकेसन पछ्याउँदा शाखा अधिकृतको घरबाट चोरीको मोटरसाइकल बरामद

रौतहट । चोरी भएको मोटरसाइकलको खोजीमा जडान गरिएको जीपीएसले देखाएको लोकेसन पछ्याउँदै प्रहरी रौतहटको कटहरिया नगरपालिका–५ स्थित एक शाखा अधिकृतको घरसम्म पुगेको छ। प्रहरीले उक्त घरबाट चोरीको मोटरसाइकल बरामद गर्नुका साथै शाखा अधिकृतका १४ वर्षीय छोरासहित दुई जनालाई पक्राउ गरेको छ।

इलाका प्रहरी कार्यालय चन्द्रनिगाहपुर र इलाका प्रहरी कार्यालय कटहरियाको संयुक्त प्रहरी टोलीले जीपीएसको लोकेसनका आधारमा बुधबार बिहान करिब ६ बजे फतुवा विजयपुर नगरपालिकामा कार्यरत शाखा अधिकृत हरेन्द्र प्रसाद यादवको कटहरिया–५ स्थित घरमा छापा मारेको थियो।

घरभित्र लुकाएर राखिएको अवस्थामा प्रदेश २–०३–००७ प ३६०० नम्बरको २२० सीसी पल्सर मोटरसाइकल बरामद भएको प्रहरीले जनाएको छ। उक्त मोटरसाइकल गरुडा नगरपालिका–५ निवासी तथा चन्द्रनिगाहपुरस्थित खुसी मार्टका सञ्चालक राकेश कुमार गिरीको रहेको खुलेको छ।

मोटरसाइकलधनी गिरीका अनुसार भदौ १ गते चन्द्रनिगाहपुरस्थित अशोका होटलअगाडि मोटरसाइकल पार्किङ गरी खाना खान गएको समयमा मोटरसाइकल चोरी भएको थियो। त्यसपछि उनले इलाका प्रहरी कार्यालय चन्द्रनिगाहपुरमा चोरीको निवेदन दिएका थिए।

चोरी भएको मोटरसाइकलमा जडान गरिएको जीपीएस भने चोरी हुनुभन्दा दुई दिनअघि नै बिग्रिएर निष्क्रिय अवस्थामा थियो। तर मंगलबार राति करिब ९ः३६ बजे जीपीएस अचानक सक्रिय भएको गिरीले बताए। जीपीएस सक्रिय भएको जानकारी पाएलगत्तै उनले प्रहरीलाई खबर गरेका थिए।

त्यसपछि प्रहरी र गिरीले जीपीएसको लोकेसन पछ्याएका थिए। जीपीएसले मंगलबार दिनभर गरुडा–कटहरिया क्षेत्रमा मोटरसाइकल ओहोरदोहोर गरेको देखाएपछि प्रहरीले सम्भावित स्थान पहिचान गरी रातभर निगरानी गरेको थियो। बुधबार बिहान उज्यालो भएपछि सम्बन्धित घरमा छापा मार्दा मोटरसाइकल फेला परेको हो।

प्रहरीका अनुसार मोटरसाइकल शाखा अधिकृत यादवका १४ वर्षीय छोरा गोलु यादवले घरभित्र राखेको खुलेपछि उनलाई नियन्त्रणमा लिइएको हो। यादवले घरअगाडि बेवारिसे अवस्थामा मोटरसाइकल भेटिएपछि आफन्तको हुनसक्ने ठानेर छोराले घरभित्र राखेको बताएका छन्।

यसैगरी शाखा अधिकृत यादवका ट्र्याक्टर चालकले पनि यस्तै मोटरसाइकल चलाउने गरेको जानकारी पाएपछि प्रहरीले कटहरिया–१ भसेढवा गाउँका २५ वर्षीय नितेश यादवलाई समेत पक्राउ गरेको छ।

मोटरसाइकलधनी गिरीका अनुसार बरामद मोटरसाइकलको इन्जिन र चेसिस नम्बर आफ्नो मोटरसाइकलसँग मिलेको छ। तर नम्बर प्लेट परिवर्तन गर्नुका साथै मोटरसाइकलको स्वरूपमा समेत केही फेरबदल गरिएको अवस्थामा फेला परेको उनको दाबी छ।

इलाका प्रहरी कार्यालय चन्द्रनिगाहपुरका प्रमुख डीएसपी सत्यनारायण थापाका अनुसार मोटरसाइकलधनी गिरीको जाहेरीका आधारमा पक्राउ परेका दुवै जनाविरुद्ध चोरीसम्बन्धी मुद्दा दायर गरिएको छ।

जिल्ला प्रहरी कार्यालय रौतहटका प्रवक्ता डीएसपी बसन्त गौतमका अनुसार पक्राउ परेका दुवै जनालाई बरामद मोटरसाइकलसहित आवश्यक अनुसन्धानका लागि इलाका प्रहरी कार्यालय चन्द्रनिगाहपुरमा राखिएको छ।

प्रहरीले मोटरसाइकल कसरी चोरी भयो, चोरीपछि कसरी शाखा अधिकृतको घरसम्म पुग्यो तथा घटनामा अन्य व्यक्तिको समेत संलग्नता छ कि छैन भन्ने विषयमा अनुसन्धान गरिरहेको जनाएको छ।

अनुसन्धान पूरा भएपछि घटनाको वास्तविकता थप स्पष्ट हुने प्रहरीले जनाएको छ।