लगातारको वर्षापछि धोबीनीका अध्यक्ष उम्मेदवार पटेलद्वारा उच्च सतर्कता अपनाउन आग्रह

पर्सा, ९ असोज

पर्साको धोबीनी गाउँपालिकाका अध्यक्ष पदका उम्मेदवार सुदिल पटेलले लगातार भइरहेको वर्षाका कारण बाढी, पहिरो तथा अन्य विपद्को जोखिम बढ्न सक्ने भन्दै सर्वसाधारणलाई उच्च सतर्कता अपनाउन आग्रह गरेका छन्।

पटेलले सामाजिक सञ्जालमार्फत सार्वजनिक अपिल जारी गर्दै अत्यावश्यक कामबाहेक लामो दूरीको यात्रा नगर्न आग्रह गरेका हुन्। उनले काठमाडौंँदेखि सडकमार्ग हुँदै वीरगञ्ज र त्यसपछि धोबीनी गाउँपालिकासम्म आउँदा यात्राका क्रममा विभिन्न जोखिमपूर्ण अवस्था सामना गर्नुपरेको समेत उल्लेख गरेका छन्।

लगातारको वर्षाका कारण सडक तथा आसपासका क्षेत्रमा बाढी, पहिरो र डुबानको जोखिम बढ्न सक्ने भएकाले अनावश्यक यात्रा नगर्न उनले सर्वसाधारणलाई आग्रह गरेका छन्। विशेषगरी वर्षा जारी रहेका बेला नदी–खोला, भिरालो क्षेत्र तथा जोखिमयुक्त सडकखण्डमा थप सावधानी अपनाउनुपर्ने उनको भनाइ छ।

पटेलले देशका विभिन्न क्षेत्रमा विपद्जन्य घटना हुनसक्ने अवस्था रहेकाले स्थानीय तहदेखि सर्वसाधारणसम्म सबैले पूर्वतयारी र सावधानी अपनाउनुपर्नेमा जोड दिएका छन्।

उनले विपद्को जोखिमलाई मध्यनजर गर्दै आवश्यक सूचना तथा सुरक्षा निकायको निर्देशन पालना गर्न र जोखिमपूर्ण अवस्थामा अनावश्यक रूपमा घरबाहिर ननिस्कन समेत आग्रह गरेका छन।