१९ वर्षपछि कर्तव्य ज्यान मुद्दाका मुख्य अभियुक्त पक्राउ

रौतहटमा १९ वर्ष पुरानो गोली हानी हत्या घटनाका मुख्य अभियुक्त पहिचान, अनुसन्धान जारी

रौतहटमा करिब १९ वर्षअघि भएको दोहोरो हत्याकाण्डको अनुसन्धानका क्रममा प्रहरीले घटनामा मुख्य संलग्नता रहेको भनिएका एक अभियुक्तलाई पहिचान गरेको छ।

मिति २०६४ वैशाख ३१ गते राति करिब १ बजे रौतहटको साविक धर्मपुर गाविस–१, हाल गढीमाई नगरपालिका–६ मा अज्ञात व्यक्ति/समूहले गोली प्रहार गर्दा साविक पिपरिया (दो.) गाविस–३, हाल गरुडा नगरपालिका–७ निवासी ३२ वर्षीय नागेन्द्र बैठा र साविक गेड्हीगुड्डठ्ठी गाविस–९, हाल गरुडा नगरपालिका–२ निवासी २८ वर्षीय प्रमानन्द सहनीको मृत्यु भएको थियो।

घटनाको निरन्तर अनुसन्धानका क्रममा हाल जिल्ला कारागार रौतहटमा अपहरण तथा शरीर बन्धक, संगठित अपराधलगायत मुद्दामा सजाय भुक्तान गरिरहेका तत्कालीन अवस्थामा तराई जनतान्त्रिक मुक्ति मोर्चालगायत भूमिगत संगठनमा आबद्ध तथा सक्रिय रहेको भनिएका **गरुडा नगरपालिका–६ निवासी सुरेन्द्र प्रसाद यादव ‘बारुद सिंह’**को घटनामा मुख्य संलग्नता रहेको खुलेको प्रहरीले जनाएको छ।

प्रहरीका अनुसार वारदात भएको करिब १९ वर्षपछि अभियुक्त पहिचान भएको हो। घटनाबारे थप आवश्यक अनुसन्धान भइरहेको जनाइएको छ।