पूर्वप्रधानन्यायाधीश जबराको घरमा सम्पत्ति शुद्धीकरणको टोली पुग्यो

पर्सा, २१ असोज 

काठमाडौं । पूर्वप्रधानन्यायाधीश चोलेन्द्र शमशेर जबराको घरमा सम्पत्ति शुद्धीकरण अनुसन्धान विभागले छापा मारेको छ। विभागको टोलीले बुधबार जबरासहित उनका निकट व्यक्ति तथा नातेदारको घरमा समेत छापा मारेको हो।

विभाग स्रोतका अनुसार जबरा र उनीसँग निकट सम्बन्ध रहेका व्यक्तिहरूको घरमा एकैपटक छानबिनका क्रममा छापा मारिएको हो। छापाका क्रममा टोलीले केही महत्वपूर्ण कागजातसमेत जफत गरेको बताइएको छ।

जबराको सम्पत्तिसम्बन्धी विषयमा विभागले अनुसन्धान अघि बढाइरहेको स्रोतको भनाइ छ। यद्यपि, छापाको विस्तृत विवरण र जफत गरिएका कागजातबारे विभागले औपचारिक जानकारी सार्वजनिक गरिसकेको छैन।

यसअघि हालै पूर्वप्रधानन्यायाधीश जबरालाई प्रहरीले नियन्त्रणमा लिएको थियो। नियन्त्रणमा लिएको करिब १२ घण्टाभित्रै उनलाई प्रहरीले घरमै पुर्‍याएको थियो।

प्रहरीले भने जबरालाई नियन्त्रणमा लिइएको नभई सुरक्षा प्रदान गरिएको बताउँदै आएको छ। सरकारका प्रवक्ता सस्मित पोखरेलले समेत सञ्चारकर्मीसँग कुरा गर्दै जबरालाई अज्ञात समूहबाट ‘थ्रेट’ आएपछि प्रहरीले सुरक्षा दिएको बताएका थिए।

सम्पत्ति शुद्धीकरण विभागको पछिल्लो छापा र अनुसन्धानले जबरासँग जोडिएका आर्थिक तथा सम्पत्तिसम्बन्धी विषय थप चर्चामा आएको छ।