रौतहटमा १५ वर्षीया बालिका भारततर्फ जाँदै गर्दा उद्धार

रौतहटको दुर्गा भगवती गाउँपालिका–५ बडहर्वाकी १५ वर्षीया सोनम कुमारी घरबाट कसैलाई जानकारी नदिई हराएपछि खोजीका क्रममा भारततर्फ जाँदै गरेको अवस्थामा फेला पारेर उद्धार गरिएको छ।

सशस्त्र प्रहरी सीमा सुरक्षा गुल्म गौरका डीएसपी दुर्गा प्रसाद भट्टको कमाण्डमा खटिएको टोलीले भारतीय SSB 20 BTN F कम्पनीसँग समन्वय गरी भन्सार गेट तथा बैरगनिया क्षेत्रमा खोजी गरेको थियो।

बालिका गौर–२ भन्सार गेट हुँदै भारततर्फ जाने क्रममा फेला परेकी हुन्। मानव बेचबिखनको जोखिममा पर्न सक्ने सम्भावना देखिएपछि उनलाई उद्धार गरी सशस्त्र प्रहरी, नेपाल प्रहरी र साना हात नेपालको संयुक्त रोहबरमा बुवा रामगोपाल सहनीको जिम्मा लगाई घर पठाइएको जनाइएको छ।