रौतहटमा ५ किलो २५० ग्राम गाँजासहित मोटरसाइकल र एक युवक पक्राउ

रौतहटको यमुनामाई गाउँपालिका–४, सरुअठादेखि झुलुङ्गे पुल जाने बाटोबाट ५ किलो २५० ग्राम लागूऔषध गाँजासहित एक युवक पक्राउ परेका छन्।

प्रहरीका अनुसार २०८३ असोज १० गते दिउँसो करिब १ बजे बमनहरस्थित अस्थायी प्रहरी पोस्टबाट प्रहरी सहायक निरीक्षक सञ्जीव कुमार साहको कमाण्डमा खटिएको टोलीले शंकास्पद अवस्थामा रहेको BR 30T 5091 नम्बरको ग्यालेम्बर मोटरसाइकल जाँच गर्दा कालो झोलाभित्र लुकाएर राखिएको गाँजा बरामद गरेको हो।

गाँजासहित दुर्गा भगवती गाउँपालिका–१, पिपरा टोल निवासी रामबिनोद साहका करिब २६ वर्षीय छोरा पुजन साहलाई मोटरसाइकलसहित नियन्त्रणमा लिइएको प्रहरीले जनाएको छ।

पक्राउ परेका साहलाई बरामद गाँजा र मोटरसाइकलसहित जिल्ला प्रहरी कार्यालय रौतहटमा ल्याई थप अनुसन्धान भइरहेको प्रहरीले जनाएको छ।