रौतहटमा अवैध सालको काठसहित एक जना पक्राउ

रौतहट । चन्द्रपुर नगरपालिका–७ स्थित रेलवे क्षेत्रमा अवैध रूपमा सालको काठ ओसारपसार भइरहेको अवस्थामा प्रहरीले एक जनालाई पक्राउ गरेको छ।

मिति २०८३ असोज ११ गते राति करिब १०ः३० बजे डिभिजन वन कार्यालय चन्द्रनिगाहपुर, प्रहरी चौकी बनबहुवरी र प्रहरी चौकी सन्तपुरको संयुक्त गस्ती टोलीले अवैध रूपमा ल्याउँदै गरिएको सालको काठ बरामद गरेको हो।

प्रहरीका अनुसार रंगपुर साझेदारी वनबाट ल्याउँदै गरेको अवस्थामा साल जातका ५ थान गोलिया काठ बरामद गरिएको थियो। बरामद काठको परिमाण करिब २५ क्युफिट रहेको र यसको अनुमानित मूल्य १ लाख ३७ हजार रुपैयाँ रहेको प्रहरीले जनाएको छ।

काठलाई तीन वटा साइकलमा लोड गरी ओसारपसार गरिरहेको अवस्थामा फेला पारिएको प्रहरीले जनाएको छ। घटनास्थलबाट एक थान आरा समेत बरामद गरिएको छ।

घटनामा संलग्न रहेको आरोपमा चन्द्रपुर नगरपालिका–७ निवासी करिब ४० वर्षीय अनिल रामलाई नियन्त्रणमा लिइएको प्रहरीले जनाएको छ। घटनामा संलग्न अन्य दुई जना व्यक्ति भने फरार रहेको र उनीहरूको खोजी भइरहेको प्रहरीले बताएको छ।

पक्राउ परेका राम, बरामद काठ तथा आरा आवश्यक कानुनी कारबाहीका लागि डिभिजन वन कार्यालय चन्द्रनिगाहपुरमा बुझाइएको प्रहरीले जनाएको छ।