श्रीमती हत्या अभियोगमा सेनाका पिउठलाई जन्मकैदको फैसला

१७ बैशाख, काठमाडौँ । आफ्नै श्रीमतीको हत्या गरेको अभियोगमा नेपाली सेनाका पिउठ दर्शन खत्रीलाई सुर्खेत जिल्ला अदालतले जन्मकैदको सजाय सुनाएको छ ।

जिल्ला अदालत सुर्खेतका न्यायाधीश वसन्तराज जोशीको इजलासले बुधबार खत्रीलाई कर्तव्य ज्यान मुद्दामा दोषी ठहर गर्दै उक्त फैसला गरेको हो । अदालतले जन्मकैदको सजायका साथै पीडितका आफन्तलाई ३ लाख रुपैयाँ क्षतिपूर्ति भराउनुपर्ने निर्णयसमेत गरेको अदालतका सूचना अधिकारी उज्ज्वलदेव रावलले जानकारी दिनुभयो ।

खत्रीले एक वर्षअघि २०८२ वैशाख २१ गते श्रीमती प्रेमा वलीलाई जङ्गलमा लगेर हत्या गरेको प्रहरी अनुसन्धानबाट खुलेको थियो । सोही अभियोगमा पक्राउ परेका खत्रीविरुद्ध २०८२ जेठ १६ गते सुर्खेत जिल्ला अदालतमा कर्तव्य ज्यान मुद्दा दर्ता गरिएको थियो । करिब एक वर्ष लामो कानुनी प्रक्रियापछि अदालतले अभियोग दाबी पुग्ने ठहर गर्दै उनलाई जन्मकैदको कठोर सजाय सुनाएको हो ।