वीरगंजमा स्रोत नखुलेको ५२ लाख ५० हजार रुपैयाँसहित चार जना पक्राउ

वीरगंज , साउन २६ —

वीरगन्ज महानगरपालिका–१० आदर्शनगरबाट प्रहरीले स्रोत नखुलेको ५२ लाख ५० हजार रुपैयाँ नगदसहित चार जनालाई पक्राउ गरेको छ।

गोप्य सूचनाका आधारमा खटिएको प्रहरी टोलीले सोमबार साँझ करिब ६ः३० बजे आदर्शनगरमा प्रदेश २–०३–००३ प ७२१५ नम्बरको कालो सुपर स्प्लेन्डर र ना.५७ प ५१८२ नम्बरको निलो एफजेड मोटरसाइकल रोकेर जाँच गर्दा उक्त रकम बरामद गरेको हो।

पक्राउ पर्नेमा भारत बिहारको सीतामढी जिल्लाको डुमरा थाना–६ का २६ वर्षीय सुरज कर्ण, बाराको प्रसौनी गाउँपालिका–१ का ३२ वर्षीय उपेन्द्र साह र २६ वर्षीय सागरकुमार सर्राफ तथा पर्साको विन्दवासिनी गाउँपालिका–१ झौवागुठीका २५ वर्षीय राहुलकुमार गुप्ता रहेका छन्।

प्रहरीका अनुसार सुरज कर्णको साथबाट १ लाख, उपेन्द्र साहको साथबाट १८ लाख १६ हजार, सागरकुमार सर्राफको साथबाट १८ लाख ३४ हजार र राहुलकुमार गुप्ताको साथबाट १६ लाख रुपैयाँ बरामद भएको हो।

बरामद रकममा १ हजार दरका ४० लाख ५ हजार, ५ सय दरका ११ लाख ७६ हजार ५ सय, १ सय दरका ६४ हजार ३ सय र ५० दरका ४ हजार २ सय रुपैयाँका नोट रहेका छन्।

बरामद नगद र दुवै मोटरसाइकलसहित चारै जनालाई नियन्त्रणमा लिएर आवश्यक अनुसन्धान तथा कारबाही अघि बढाइएको जिल्ला प्रहरी कार्यालय पर्साले जनाएको छ।