पूर्वराजा ज्ञानेन्द्रले यस वर्ष सर्वसाधारणलाई दसैँको टीका नलगाइदिने

बिरगंज, पर्सा, २५ असोज 

पूर्वराजा ज्ञानेन्द्र शाहले यस वर्षको बडादसैँ सादगीपूर्वक मनाउने निर्णय गर्दै सर्वसाधारणलाई दसैँको टीका नलगाइदिने भएका छन्।

निर्मल निवासस्थित संवाद सचिवालयले जारी गरेको सूचनाअनुसार, पछिल्लो समय भएका प्राकृतिक विपत्तिका कारण ठूलो जनधनको क्षति भएको र हजारौँ नागरिक विस्थापित हुनुपरेको अवस्थालाई ध्यानमा राख्दै दसैँ सादगीपूर्ण रूपमा मनाउने निर्णय गरिएको हो।

सूचनामा भदौमा हिमपग्लिएर आएको भीषण बाढी तथा असोजमा भएको अविरल वर्षाका कारण सयौँ मानिसको ज्यान गएको, हजारौँ प्रभावित भएको र ठूलो मात्रामा भौतिक क्षति पुगेको उल्लेख गरिएको छ।

प्राकृतिक विपत्तिका कारण प्रभावित नागरिकप्रति संवेदनशीलता व्यक्त गर्दै यस वर्ष सर्वसाधारणलाई टीका तथा जमरा लगाइदिने कार्यक्रम नराख्ने निर्णय गरिएको जनाइएको छ।

नेपालीहरूको प्रमुख चाड बडादसैँमा पूर्वराजा ज्ञानेन्द्रले विगतका वर्षहरूमा निर्मल निवासमा सर्वसाधारणलाई टीका लगाइदिने गरेका थिए। तर, यस वर्ष भने विपत्तिबाट प्रभावित नागरिकको अवस्थालाई मध्यनजर गर्दै दसैँ सादगीपूर्वक मनाउने निर्णय गरिएको हो।