चितवनमा बोलेरो जीप दुर्घटना, २५ जना घाइते

बिरगंज, पर्सा, २० कार्तिक 

मकवानपुर। चितवनको राप्ती नगरपालिका–५ स्थित सिपडाँडामा बोलेरो जीप दुर्घटना हुँदा २५ जना घाइते भएका छन्।

जिल्ला प्रहरी कार्यालय चितवनका अनुसार शुक्रबार अपराह्न करिब ४ः३० बजे भण्डाराबाट थाकलटारतर्फ जाँदै गरेको बा.प्र.०१–०३५ च २८८६ नम्बरको बोलेरो जीप अनियन्त्रित भई दुर्घटनामा परेको हो।

सिपडाँडास्थित भित्री सडकखण्डबाट जीप करिब ५० मिटर तल खोल्सामा खसेको प्रहरीले जनाएको छ। दुर्घटनाका समयमा जीपमा सवार २५ जना घाइते भएका थिए।

प्रहरीका अनुसार घाइतेहरूको उद्धार गरी उपचारका लागि अस्पताल पठाइएको छ। उनीहरूको अवस्था मध्यम रहेको बताइएको छ। घाइतेहरूको नाम र ठेगाना भने खुल्न बाँकी छ।

घटनाबारे थप अनुसन्धान भइरहेको जिल्ला प्रहरी कार्यालय चितवनले जनाएको छ।